وصيه صفيه 1

الفصل الأول

الحكاية بإختصار بدأت في يوم كنت قاعد فيه مع عمي في أوضة مكتبه في الفيلا بتاعته…الباب خبط ودخلت منه نادية بنت عمي الكبيرة

نادية بإبتسامة:
– صباح الخير يا بابا

بادلها والدها الإبتسامة قائلا:
-صباح النور على بنوتي الحلوة….غريبة إيه اللي مصحيكي ومخليكي تروحي الجامعة بدري كده النهاردة…لأ وكمان جاية تقوليلي صباح الخير…شكلك كده بيقول انك عايزة فلوس

أجابت على الفور قائلة:
-إيه ده هو أنا باين عليا اوي كده…ولا انت اللي دايما قاريني كده ومابعرفش اخبي عنك حاجة ابدا

اجابها دون أن تفارقه إبتسامته
-:ها عايزة كام يا ستي المرادي?

نادية: انت وذوقك بقى يا صفوت باشا.

اجابها وهو يقوم بفتح الخزانة الموجودة بجوار مكتبه:
-:حاضر يا ستي من عنيا…بس ما قولتيليش عاوزاهم في إيه?

نادية : اصل الكلية عندنا عاملة رحلة لشرم…وأنا عايزة اطلع مع صحابي

استدار إليها قائلا بجدية:
-والرحلة دي فيها بيات يعني?

ابتسمت قائلة:
-طبعا يا بابا…امال حاروح شرم وارجع في نفس اليوم يعني؟

ضيق عينيه قائلا في ضيق:
-ايوه يا نادية بس انتي عايزة تروحي شرم وتباتي هناك لوحدك

نادية: يابابا ماانا قلت لحضرتك إني رايحة تبع الكلية…يعني حيكون معايا صحابي والدكاترة بتوعي…يعني مافيهاش حاجة …ماتحبكهاش بقى

ابتسم قائلا وهو يمد يده إليها بالمال:
-خلاص يا ستي حاقول إيه تاني…انتي اصلا بتعرفي تثبتيني ازاي…بس إيه ده يا نادية…كل ده وماسلمتيش على ابن عمك

التفتت نادية إلى الشاب الجالس امام المكتب قائلة بضجر:
-سوري يا علي…ماخدتش بالي انك هنا…ازيك وازي طنط سمية ولبني ولميا كلهم عاملين إيه?

ابتسم علي قائلا بسعادة:
-الحمد لله يا نادية…كلنا بخير …انتي أخبارك إيه?

اجابت قائلة بتعالي:
-زي الفل زي ما انت شايف…ثم اعادت النظر إلى والدها قائلة: سلام بقى يا بابا…عشان الحق ادفع إشتراك الرحلة

صفوت:مع السلامة يا حبيبة بابا

خرجت نادية واغلقت الباب خلفها فالتفت علي إلى عمه قائلا بتردد:
– إذا سمحتلي يا عمي…كنت عايز اقول حاجة لحضرتك بس من غير ما تزعل مني

حدق فيه صفوت ثم قال بإندهاش:
-إيه اللي بتقوله ده يا علي…أنا ازعل منك برضه…انت عارف كويس انك بالنسبالي مش ابن أخويا وبس…انت إبني اللي ماخلفتوش يا علي…قول اللي انت عايزه علطول.