دموع ممنوعه ١

..أنتى قولتيلى انتى بتشتغلى ايه ؟
…ههههههههه ، والله ، انت كمان متعرفش انا بشتغل ايه ..
…لأ معرفش ، كل اللى اتقالى انك موظفة فى وزارة التموين ، صح كدة ..
… ده حقيقى ، بشتغل محققة فى الشئون القانونية. .
..محققة ! قولتيلى ..
…يعنى إيه ..
..لا ابدا ..
…طيب ممكن ترد على سؤالى ..
…أنتى مصممة ؟
..طبعا ، لان إجابتك هيعتمد عليها حاجات كتير جدا ..
…زى ايه ؟
.. زى مثلا ازاى هتعامل مع اهل جوزى ،،معلوماتى بتقول انك عايش فى بيت عيلة مش لوحدك بالرغم من انك بتشتغل فى مجال تانى غيرهم خالص ،،وياترى هكون محبوبة ولا مكروهة ، والأهم من كدة لازم اعرف انت مجبر ولا لأ ، لأن ده طبيعى هيحدد شكل علاقتنا بعد كدة ..
…شكل علاقتنا ، يعنى لو قلتلك أنى مجبر فعلا ، مش هترفضى الجواز ..
..أفهم الأول وبعدين أقرر ..
.. طيب ياستى ، بس يارب تقدرى اللى هقوله ، لكن عندى طلب الأول قبل ما أقول أى حاجة ..
..اتفضل ..
.. إللى هقولهولك دلوقتى ، ياريت ميوصلش لعمى أكرم أنى قولته ، مهما كان قرارك ، وافقتى أو رفضتى ..
..اوعدك ، ومش بس عمك ، واى حد تانى ، اتفضل قول ..
.. أنا فعلا مش عايز اتجوز ، والعيب مش فيكى ، انا رافض فكرة الجواز عموما ..
..أمال انت بتعمل ايه هنا دلوقتى. .
..بنفذ طلب عمى ..
..وهو عايزك تتجوزنى ليه ؟..
..أبقى اسأليه هو ..
..وانت عندك استعداد تتجوز غصب عنك ..
..متفرقش كتير ..
..يعنى لو اتجوزنا ، ايه اللى هيحصل بينا ..

حقا هذه الفتاة تدهشه وتحيره بحد سواء ، لديها كمية من الجرأة تجعله يسترسل معها فى الحديث بصراحة.

..مش فاهم ..
..يعنى هتتعامل معايا أذاى ؟..
..أه ، انا اسف ياآنسة فريدة ، بس متنتظريش منى كتير ..
.. تمام كدة ، هو ده اللى انا عايزاه ..
..أفندم ، تقصدى ايه ؟
.. يعنى انا مش منتظرة منك حاجة اصلا ..
..مش فاهم ..
..قوللى الأول يادكتور ، انت موافق على شروطى اللى انا قلتها فى الاول ..
..معنديش مشكلة. .
..تمام ، اسمعنى بقى كويس ، بالرغم أنى عندى تساؤلات كتير جدا ، إلا أن واضح اوى أن الإجابات اللى انا عايزاها مش عندك ، عند أكرم المصرى نفسه ، ياخبر انهارضة بفلوس ، أما بالنسبة للى يخصك فى الموضوع ده ، هعمل معاك اتفاق هيحللنا مشكلتنا احنا الاتنين. ..
..اتفاق ومشكلتنا ، ممكن تفهمينى اكتر ..
..افهمك ، انا كمان مجبرة على الجوازة دى ، زييك بالظبط ، فبالتالي العند والرفض مش هيكون حل ، الحل أنى انفذ كلام أبويا ، وانت تنفذ كلام عمك ..