رواية مستحيل الجزء الأول
رواية مستحيل الجزء الأول
نهض خالد فقالت هند بلهفة لم تخفي على عيونه: رايح فين؟
ابتسم قائلا بحب: مش رايح في حتة.
ليميل ويربت علي يدها مردفا بحب: احنا خلاص لقينا بعض ومش هنفترق تاني ياحبيبتي.
ليستقيم قائلا: أنا بس هسيبك ترتاحي شوية وهرجعلك تاني، عندنا كلام كتير لسة مقلناهوش.
ابتسمت فابتعد مغادرا مع والدته وصديقه الذي استدار يلقى عليها نظرة أخيرة قبل أن يختفي خلفهم لتقول خالتها بحنان: حنين قوي زيك وزي مامتك الله يرحمها.
بينما قالت صفية: اهو لو كنت شفتيه أول مرة كنت قلتي انه واحد تاني خالص غير اللي كان واقف قدامنا ده.
الصدمة يابنتي تجنن أي حد وخصوصا واحد زي خالد عاش كل السنين اللي فاتت دي ميعرفش أمه وفاكر انه عايش بين أهله الحقيقيين.
بس طنط منيرة حنينة قوي.
وأنا كنت هرضي أدى خالد لحد الا لو كنت متأكدة من حنيته عليه يابنتي.
استمعت لهم هند دون أن تشترك معهم في الحديث تكتفي بابتسامة سعيدة، تحمد الله على ظهور خالد في حياتها. هذا الأخ الذي لولاه لضاعت حقا إلى الأبد، انه عوض الله لها وكم يكون عوضه، جميلا.
الفصل الثامن
كانت وردة تنام في سريرها حين فوجئت بحماتها تقتحم الحجرة قائلة: لسة نايمة يابرنسيسة؟ بقالي ساعة بنادي عليكي.
اعتدلت جالسة تفرد جسدها بغنج قائلة: ومنامش ليه يامرت عمي؟ مش لساتني عروسة جديدة؟
اتسعت عينا نجية باستنكار قائلا: عدا عشر أيام علي فرحك وتقوليلي عروسة جديدة؟
حدانا في البلد بيتجال عليها عروسة جديدة لحدن ماتجيب الولد.
قالت نجية بسخرية: حدانا بقي هو أسبوع وبتقوم تشوف اللي وراها يابرنسيسة.
هبطت وردة من السرير وذهبت تجاه المرآة، جلست علي الكرسي أمامها وأمسكت الفرشاة تمشط شعرها بهدوء قائلة: وأني ورايا إيه يعني غير اني أتزوج لجوزي عشان أبسطه.
لا ياعينيا وراكي كتير، وراكي مسيح وترويق الشقة وطبيخ كمان.
لما أني هعمل كل ده انت هتعملي ايه؟
اقتربت منها نجية تمسك يدها و تجعلها تنهض لتواجهها بغضب قائلة: بت انت اتعدلي ليمين الله أقول لابني وأخلي أيامك سودة معاه.
نفضت وردة يدها قائلة بتحدي: انت اللي فوجي ياحماتي واسمعيني منيح، أني مش هند اللي عتديها فوج دماغها وتسكتلك لع، ده أني لحمي مر جوي. هتسممي ودان جوزي من ناحيتي هجول لأبوي وده عيزعله وانت عارفة منيح كبير الهوارية لما يزعل ايه اللي ممكن يحصل؟ مش عجولك انه عيمنع عنك خيره اللي مغرجك من يوم مااتجوزت ولا عجولك انه ممكن يسحب ماله من محل ولدك. لاه. ده زعل أبوي ميراضيهوش غير الدم.
اتسعت عينا نجية تقول بخوف: وليه يابنتي بس؟ وانا يعني كنت عملت ايه؟
رفعت وردة إحدي حاجبيها وهي تعاود الجلوس امام المرآة تمشط شعرها قائلا: انت أدري بعمايلك السودا يامرت عمي، الوجت مشي من كدامي وروحي شوفي اللي وراكي جبل جوزي مايعاود وحسك عينك تجولي انك عملتي إكده ولا إكده وإلا انت خابرة.
