رواية مستحيل الجزء الأول
رواية مستحيل الجزء الأول
طالعته تقاوم هذا الأمل الذي انبثق من كلماته، ترغب في تصديق أنها يوما ما ستنجو حقا من هذا المرض اللعين وتعود إلى حياتها الطبيعية مرة أخري ولكن هذه التجارب التي لطالما سمعت عنها تدحض أملها وتخيبه لذا اكتفت بهزة رأس خفيفة باهتة منحته إياها وقبل ان تقول شيئا سمعت طرقات على باب الحجرة ثم دلفت خالتها تتبعها صفية تقول الأولى بألم: ياضنايا يابنتي، قلتلكم عين وصابتكم يابناتي مصدقتونيش.
جلست جوارها تقول بلوعة: حاسة بإيه يابنتي؟ طمنيني عليكي.
أسرعت هند ترتمي بحضنها تبكي بقوة بينما طالعهما كل من عادل وصفية بقلة حيلة حتى سكبت هند دموعها في صدر خالتها قبل أن تخرج من حضنها قائلة: انت عرفتي منين اني في المستشفى ياخالتي؟
طالعت خالتها عادل بحنق قائلة: كلمت البيت حماتك ردت عليا وقالتلي انك في المستشفى ولما سألتها كفى الله الشر. مالها هند؟ قالتلي تلاقيها بتدلع زي عوايدها. كلمت جوزك تليفونه كان مقفول. اتجننت. كلمت المستشفي رد عليا دكتور عزيز و قاللي على حالتك جيت جري انا وصفية اللي ياكبدي اول ماعرفت نطت من السرير وجت معايا جري.
أشاح عادل بوجهه يدرك هذا اللوم الخفي علي أمه في كلمات السيدة نبيلة لم يستطع تحمله رغم ادراكه خطأ والدته ليخرج من الحجرة متضايقا، فقالت صفية مؤنبة والدته: مكنش ليه لزوم الكلام ده ياماما. أهو عادل زعل.
بس يابت. انت مسمعتيش حماتها كلمتني ازاي. ولية قرشانة مش عارفة حبيبتي هند مستحملاها ازاي.
أطرقت هند بحزن قائلة: ربنا يسامحها بقى. أنا مش عارفة هي عايزة ايه بالظبط؟
قالت خالتها: ودي فيها كلام؟ عايزة تفرق بينك وبين جوزك عشان تجوزه الغندورة بنت عمه. انت نسيتي لما جت تخطبك قعدت تشعر فيها ازاي وتتحسر على أنها مطلعتش من نصيب ابنها. والله لولا انك كنت بتحبي عادل وهو كمان بيحبك كنت طردتها من البيت بالمقشة البلح اللي بكنس بيها السلم.
قالت هند بوهن وقد شعرت ببعض التعب: الظاهر انها هتحقق أمنيتها وتخلص مني وساعتها هتجوزهاله وترتاح.
قالت صفية ونبيلة في ذات الوقت: بعيد الشر عنك ياهند.
لتردف خالتها قائلة: يابنتي متقوليش كدة. خلي أملك في الله كبير. هو قادر يشفيكي ويعافيكي ويخرجك من ازمتك على خير.
لتقول صفية بحنان: انت مش قلتيلي اني لازم يبقى عندي يقين في رحمة ربنا، و اني سندك ياهند؟
هزت هند رأسها فمدت لها صفية يدها مردفة: خلاص يبقى ايدي في ايدك هنحارب مرضنا، انت الجسدي وانا النفسي وبإذن الله ربنا هيعينا وهننتصر. قلتي ايه ياهنودة؟
