السكرتيرة الحسناء

الحلقه_الاولى

صحيت مدام احلام من النوم على صوت جرس الباب بصت في الساعه لقيتها 8 الصبح فاستغربت مين هيزورها بدري كده فلبست نظارتها والروب بتاعها وقامت تفتح الباب ولما فتحت لقيت قدامها بنت اختها الصغيره شهد وكانت بتعيط جامد اوي فاخدتها في حضنها ودخلتها جوه وراحت تعملها كوباية عصير عشان تهدي اعصابها وبعد ما شربت لعصير قالت مدام احلام:
احلام:هديتي؟
شهد:ايوه
احلام:ممكن اعرف ايه اللي حصل بالضبط؟
شهد ابتدت تعيط تاني……………………..
بصتلها احلام ولقيتها نسخه من اختها الصغيره الله يرحمها شعرها طويل وبني وكيرلي وعينيها عسلي فاتح وبشرتها بيضا بس فيها نمش وطولها 165سم وجسمها مضبوط وشهد كملت 21 سنه من شهرين وبعد وفاة باباها ومامتها عاشت مع اخوها ومراته واحلام حاولت تاخدها تعيش عندها بس اخوها مرضيش ابدا وبالرغم من ان مراته بتكره شهد الا انه صمم على رأيه وطبعا احلام سكتت بس واضح ان المره ده مرات ابن اختها زودتها مع شهد خالص………..
احلام:عملتلك ايه المره دي؟
شهد وهي بتعيط:طردتني عشان مش موافقه اتجوز اخوها
احلام:هي حصلت خلاص انتي مش هترجعي بيتهم تاني ومادام اخوكي مش عارف يحافظ عليكي انا هخليكي معايا وهحطك فعينيه
شهد:وهتقولي ايه لابيه هشام؟
احلام :ملكيش دعوه قومي خدي دش وادخلي نامي في الاوضه التانيه
شهد قامت ودخلت الحمام وهي تحت الميه قعدت تفكر كانت هتعمل ايه لو مكنتش طنط احلام موجوده في الدنيا بعد موت مامتها وباباها
وقررت شهد انها لا يمكن ترجع عند هشام ومراته تاني ابدا………………….
الساعه 12 الظهر رن جرس الباب فخافت شهد فاحلام قالت:
احلام:ادخلي جوه ومتخرجيش
شهد:هتعملي ايه معاه؟
احلام:متخافيش يا حبيبتي
فتحت احلام الباب ولقيت هشام واقف فقالتله:
احلام:ادخل يا هشام
هشام:صباح الخير يا طنط ,فين شهد؟
احلام:اختك عندي من بدري بعد ما مراتك طردتها
هشام:شيماء مكنش قصدها تطردها
احلام :بص يا هشام مراتك مضايقه من وجود اختك صح ولا لأ؟
هشام:لأ طبعا ده بيتي
احلام:و بيتها هي كمان ومن حقها تعيش فيه براحتها
هشام:يعني اسيب اختي تعيش بعيد عني؟
احلام:بص يا هشام انا من بعد وفاة جوزي وانا عايشه لوحدي سيب شهد تعيش معايا وبكده كلنا هنرتاح
هشام:والناس تقول ايه؟
احلام:الناس مش هتتكلم لو انت قلت اني انا اللي طلبت ان شهد تعيش معايا عشان انا حاسه بوحده
هشام:حضرتك شايفه كده؟
احلام :صدقني ده احسن حل
هشام:طب ممكن اشوف شهد قبل ما امشي؟
احلام:شهد تعالي سلمي على اخوكي
شهد جت واول ما شافت هشام حضنها جامد وقالها:انا آسف على كل اللي حصل
شهد:انت ملكش ذنب
هشام:خلي بالك من نفسك
شهد:متقلقش عليه
ومشي هشام وهو بيمسح دموعه عشان شهد هتعيش بعيد عنه بس المشاكل بينه وبين شيماء بسبب شهد زادت اوي وهو تعب .
احلام:يلا بقى عشان هننزل نتغدى في النادي
شهد بصت لهدومها وقالت :لأ انا مش عايزه اخرج
احلام:بصي يا شهد انا ربنا مرزنقيش بأطفال فعايزاكي تعتبريني زي مامتك الله يرحمها ,اتفقنا؟
شهد:اتفقنا
احلام:اول حاجه هنروح نشتريلك لبس كتير وبعد كده هنتغدى في النادي وبعدين نفكر هتعملي ايه الفتره اللي جايه
شهد حضنت احلام جامد وحست ان الدنيا هتضحكلها لأول مره من يوم موت مامتها

رواية السكرتيرة الحسناء.

بقلم نهلة أبوشهبة.

الحلقه التانيه

نزلت شهد مع مدام احلام واشترت لبس كتير وشيك وكانت شهد فرحانه اوي لأنهامكنتش بتقدر تطلب حاجه في بيت هشام عشان مراته كانت بتزعل وبعد كده راحوا اتغدوا في النادي ورجعوا البيت بالليل ونامت شهد في اوضتها وتاني يوم صحيت بدري لقيت مدام احلام بتفطر وهتنزل شغلها فقالت:
شهد:صباح الخير يا طنط
احلام:صباح الخير يا حبيبتي,ها نمتي كويس؟
شهد:جدا جدا
احلام:انا هروح الشغل وانتي اقعدي ارتاحي والشغاله هتيجي الساعه 10 تعمل كل حاجه
شهد:اوكيه
احلام :عايزاكي تفكري عايزه تعملي ايه الفتره اللي جايه؟
شهد:مش عارفه
احلام:يعني تحبي تاخدي كورسات او اي حاجه تشغل وقتك؟
شهد:انا اخدت كورسات انجليش وكمبيوتر لما كانت ماما عايشه ومش محتاجه تاني
احلام :برده فكري عقبال ما آجي
شهد:حاضر
ونزلت احلام وفضلت شهد قاعده على الكومبيوتر تشوف اخبار الدنيا وكل شويه الشغاله تسألها تشرب حاجه وحست شهد انها اكيد بتحلم بعد كل المشاكل في بيت اخوها وخناقات مراته معاها بقت عايشه في هدوء بس يا ترى هتفضل عايشه كده من غير ما تعمل حاجه مفيده؟؟؟؟؟؟؟؟؟؟؟؟؟؟؟؟؟؟؟
رجعت مدام احلام الساعه7 المغرب وغيرت هدومها وقعدت تتعشا مع شهد:
احلام:ها يا حبيبتي عملتي ايه انهارده؟
شهد:قعدت عالنت واتفرجت عالتليفزيون
احلام:طب فكرتي عايزه تعملي ايه؟
شهد:آه فكرت
احلام:ها قولي؟
شهد:انا عايزه اشتغل
احلام:تشتغلي؟
شهد:ايوه يا طنط انا لازم اخرج للدنيا واشوف ناس وكمان اكسب فلوس
احلام:طب وعايزه تشتغلي ايه؟
شهد:بصي يا طنط انا خريجة تجاره انجليش ومعايا كورسات كتير فمتهيألي سهل الاقي شغل
احلام:طيب سيبيني افكر وارد عليكي
شهد:ربنا يخليكي ليه يا احلى خاله في لدنيا
وبعد اربع ايام الصبح كانت شهد قاعده بتتفرج عالتلفزيون رن تليفون البيت:
شهد:الو
احلام:كويس انك صاحيه
شهد:خير يا طنط في حاجه
احلام:عندي ليكي خبر حلو اوي
شهد:خير فرحيني؟
احلام :عايزاكي تقومي تلبسي البدله البيج اللي اشتريناها سوا وتحطي ميك اب رقيق وتجيلي الشركه اللي بشتغل فيها خلال ساعه
شهد:طيب بس قوليلي فيه ايه؟
احلام :سكرتيرة المدير خدت اجازة وضع وانا رشحتك تاخدي مكانها
شهد:بجد طيب قوليلي العنوان
احلام:اركبي تاكسي وقوليله الشركه المتحده للتسويق العقاري
شهد:خلاص استنيني انا جايه
احلام:اوعي تتأخري
شهد:لا طبعا باي
احلام:باي يا حبيبتي
وجريت شهد على الحمام خدت دش بسرعه ولبست البدله البيج وكان بنطلونها ضيق والجاكت قصير ولبست تحتيها بادي بني وشوز بني بكعب وشنطه صغيره بني
بس كانت متدايقه من شعرها مكنش بيتعمل اي حاجه غير انه يفضل مفرود ونازل كيرلي وتقيل جدا وهي كانت مش بتحبه بس مفيش وقت تروح للكوافير وحطت ميك اب خفيف ونزلت وركبت اول تاكسي……………………………

في الشركه كان معتصم قاعد مدايق اوي عشان السكرتيره خدت اجازه وهو مش عارف يلاقي اي ورق محتاجه بس كان مستني السكرتيره اللي قالت عليها مدام احلام مديرة العلاقات العامه وفضل مستنيها……………..
بعد ساعه سمع معتصم خبطه على باب مكتبه واتفتح الباب ولقي مدام احلام داخله وبتبتسم ووراها بنت صغيره اوي في السن وشعرها كتير اوي وعينيها واسعه وبريئه وكان وشها احمر من الكسوف
دخلت شهد ورا خالتها مكتب المدير ولقيت شاب ممكن يكون في اوائل التلاتينات قاعد على مكتب فخم جدا ولابس بدله رمادي فاتح وتحتها قميص اسود وبشرته سمرا وعينيه سودا بس واسعه اوي وشعره اسود وناعم وطويل ولقيته بيبصلها من فوق لتحت فادايقت جدا وكانت عايزه تجري من ادامه
احلام:صباح الخير يا معتصم
معتصم :صباح الخير يا مدام احلام
احلام:اقدملك شهد السكرتيره اللي كلمت حضرتك عنها
معتصم:اتفضلي اقعدي يا شهد
شهد:صباح الخير يا فندم (ومدت ايديها تسلم عليه ومسك ايديها جامد وهي حست بان جسمها كله بترعش وقعدت على الكرسي)
معتصم:اتفضلي حضرتك يا مدام احلام
احلام:عن اذنكوا
معتصم فضل يبص لشهد و شهد عايزه تقوم من ادامه عشان شكله مقتنعش بيها
معتصم:انتي اتخرجتي امتى؟
شهد:الصيف اللي فات
معتصم :يعني من شهرين؟
شهد:ايوه
معتصم:معاكي كورسات؟
شهد قدمتله ملف فيه كل الكورسات اللي خدتها وكمان التدريب بتاع الكليه
معتصم بص في الملف وضحك:ده انتي شكلك شاطره اوي
شهد:حضرتك تقصد ايه؟
معتصم:اصل بصراحه شكلك صغير اوي
شهد:طب ما حضرتك صغير على انك تكون مدير شركه
معتصم:معاكي حق بس انا مسكت الشركه بعد ما بابا تعب وبعد ما علمني كل حاجه
شهد:انا مقصدش كده انا قصدي ان السن ملوش علاقه بقدرات الانسان
معتصم:يعني انت قد الشغل معايا
شهد:ان شاء الله
معتصم:طب بصي انا هوافق انك تشتغلي شهرين تحت التدريب
شهد ضحكت جامد اوي وعينيها كانت بتلمع من السعاده:ان شاء الله هكون عند حسن ظن حضرتك
معتصم:والمرتب في الفتره ده 3الاف جنيه
شهد:اوكيه
معتصم:تيجي بكره الساعه 7 ومدام احلام هتفهمك نظام الشغل
شهد:اوكيه عن اذن حضرتك
وخرجت شهد وفضل معتصم يبص عليها وهو مش مصدق انه وافق يعين بنت ضغيره كده سكرتيره بس قعد يضحك عشان حس انها شخصيه قويه وعايزه تحقق حاجه في حياتها…………………………………
خرجت شهد من مكتب معتصم لقيت احلام مستنياها :انا اتعينت
احلام:بجد
شهد:اه وكمان هيديني 3 الاف جنيه تخيلي
احلام :مبروك يا حبيبتي
شهد:انا هآجي بكره الساعه 7 الصبح
احلام طيب تعالي معايا اعرفك النظام ايه في الشركه وكمان اعرفك مكان الملفات والاوراق المهمه…………………………………