قبل فوات الاوان ١

حينما كتبت اسمه شعرت بدمعة نزلت من عينها وتتذكر كلمات والدتها لها

شريفة : بس يا ندي متلوميش الا نفسك

هي ملامة علي انها صدقت انه احبها هل هي لا تستحق ان تحب ولكنها كتبت في اجندتها
(كان علي ان اتذكر ان للعقل دور مثل القلب )

نعم لقد صممت اذنها ولم تسمع كلام كل من نصحها سواء امها او اختها او حتي عمتها رغم انها بعد معرفة تصميمها حاولت مساعدتها اكثر من مرة ولكنها كانت دايما تقول لندي ربنا يخيب ظني

وها هي خطوبة اخري تم فسخها بعد كتب كتاب قد طلقت منه

ولازالت دموع ندي تنزل وتعود مع اول مرة تشعر بفرحة حقيقة

—————————–

قبل اربعة شهور

مدحت :انا عايزك تختاري اللي يعجبك وملكيش دعوة بحد

ندي : مش مشكلة بس بردوا انا نفسي اللي نختاره يرضي مامتي ومامتك

مدحت :مامتي ومامتك انتي بتطلبي المستحيل المهم انا قلت علشان المشوار يخلص علي خير ناخد معانا عمتو احلام احسن تمام يا نادو

ندي : انا قولتلك بلاش نادو وكده الكلام ده مش وقته اتفاقنا

مدحت : اتفاقنا مش حتنقي الشبكة بقي

ندي : حانقي اهو

احلام : ها يا ولاد مفيش حاجة عاجبتكم

اشارت ندي الي اسورة اعجبت بها

ندي : دي عاجبتني يا عمتو

مدحت : اخيرا اشهد ان لا اله الا الله

ندي وهي تضحك : انتي بتتشاهد من الشبكة

احلام : لسه بدري يا عم مدحت

مدحت : والله يا عمتو لو ندي توافق اعمل الفرح بكرة

ندي تخجل وتبتسم وتظل صامتة

مدحت : مبروك علي الشبكة

ندي : الله يبارك فيك

——————————–

رغم ان الخطبة كانت عائلية وبسيطة الا ان ندي كانت سعيدة وسعادتها كانت تزيد عندما تسمع كلمة اطراء او تري نظرة اعجاب في عين مدحت

بدأت الخطوات الجادة في الموضوع تأخذ منأها حتي كانت ندي تخطط لكل شئ وتتخيل حياتها مع مدحت

والتغيير الحقيقي الذي ستفعله بحياته

وكلما شردت حاولت التركيز اكثر علي الدراسة وحفظ القران حتي تنتهي السنة علي خير وحتي تنهي حفظ القران قبل الزواج فكلمة الحاجة اماني مديرة الدار لازلت ترن في اذنها

——————————————

الحاجة اماني : انتي دلوقتي بقي فاضلك خمس اجزاء وتنهي حفظ القران لو قدرتي تنهيهم قبل الجواز اكيد ده حيكون افضل ليكي ويا ريت لو اشتغلتي معانا في الدار يا ندي

ندي : ان شاء الله انا كمان حاسة ان الخطوة دي نفسي فيها اوي احفظ القران واحفظه