قبل فوات الاوان ١

في اتجاه السلالم صعدت ندي وهي تزفر بشدة كانت قاب قوسين او ادني ان تفهم سر الضيق من هذا الاسم
اسم رفعت الصاوي
حدثت نفسها قبل ان تدخل منزلها : تري ما سر هذا الاسم اسم رفعت الصاوي

دخلت ندي واتجهت الي غرفتها وجلست وقد لفت قدميها في يديها كانت صورة لوجي معلقة امام عينيها
ضحكاتها وبكائها وصوتها وهي ترتل معها القران كانت تعرف جيدا انه ليس سهلا ان تعود ولكن لوجي
زفرت بكل ما اوتيت من قوة حتي سمعت
شريفة : للدرجة دي يا ندي مش خايفة تطيري حاجة من الاوضة ثم سألتها : انتي روحتي فين
ندي : كنت عند عمتو
شريفة : كنتي عايزها في حاجة
ندي : ابدا بسأل عليها بس بقالي مده مشفتهاش ثم اكملت بضيق : ماما انا لو كملت مع لوجي تزعلوا
التفتت شريفة لندي حيث انها كانت متجه للخروج من غرفتها وردت : تاني يا ندي مش باباكي يوم ما كلمتي اللي اسمه حازم ده قالك خلاص متروحيش تاني
ندي : ما هو اللي اسمه حازم ده اعتذارلي 3 مرات وقالي اي ترضية انا عايزها المهم مسبش لوجي
اتاها صوت والدها خارج غرفتها ولكنه كان يرد عليها : واخرتها في دماغك يا ندي احنا خايفيين عليكي يا بنتي
ندي : يا بابا متخفش عليا انت عارفني كويس وبعدين انا مش حاحتك بحد تاني حاروح علي حلقتي اخلصها وبعدين امشي وحاحط الشروط اللي انا عايزها كمان بس يا بابا ارجوك توافق لان لوجي فعلا صعبانة عليا اوي ومش عايزة اسيبها
عماد بضيق : ماشي يا ندي بي افتكري اني نصحتك وانتي ادري بمصلحتك
شريفة : انت حتسيبها تروح
عماد : ايوة

————————————————–

دخلت دادا محاسن الي حازم في مكتبه حتي تبلغه باتصال ندي وما قررته
محاسن : انسة ندي اتصلت بحضرتك
حازم : طب مخالتنيش اكلمها ليه
محاسن : هي طلبت تكلم مدام فريدة بس مدام فريدة في النادي قولتلها تكلم حضرتك مرضيتش قاللي ابلغك ردها
حازم بضيق : اللي هو ايه بقي
محاسن : هي اولا حتغيير المواعيد وحتخليها الصبح من 11 ل 1 بدل بعد الضهر وشرطها ان مدام فريدة بس اللي تتعامل معاها وتكون موجودة في البيت وهي موجودة
حازم : بس كده
محاسن : ايوة
حازم : طب لو اتصلت تاني بلغيها ان انا موافق

———————————————–

كان عصام متجها لفراشه لينام رن هاتفه نظر الي الاسم فكان مني اراد ان لا يرد ولكن الهاتف ظل يصر علي الرنين
عصام بضيق : ايوة
مني : ازيك يا عصام وحشتني اوي يا حبيبي
عصام : اهلا ازيك
مني : انا الحمد لله كويسة انت عامل ايه
عصام : كويس
مني : كده برضوا يا عصام لو قعدت بالشهور يا بني مسألش عليك ولا تسأل
عصام : انتي عارفة ان انا مشغول ومش فاضي
مني : يعني لو طلبت منك تحضر خطوبة سمية مش حتيجي
عصام : واحضرها ليه
مني : مش خطوبة اختك
عصام : ما انتي عارفة اني مش فاضي
مني : كده يا عصام كل ما اقولك تعالي تقولي مش فاضي طب اجيلك انا اشوفك لا برضوا مش فاضي
بلاش القسوة دي عليا يا عصام انا مهما كان مامتك
عصام : طيب حاحاول احضر حاجة تانية
مني : ابقي بس اسأل عليا يا عصام والله يا بني بتوحشني
عصام : طيب سلام