يونس كامله

نعمممم هو مين ده اللي يجي يعيش معانا لا مؤاخذه!!
ماما بهدوء :
-يونس
قومت من مكاني وانا بهب*د الفون بع*صبيه:
– يونس طليقي ؟!!!
ماما وهي بتبصلي بغموض:
– الراجل بيته وقع وشركاته فلست وبقي علي الحديده يعيش في الشارع يعني ؟!
رديت بعصبيه:
– ما يعيش في الشارع ولا يول*ع احنا مالنا بيه هو كان من بقيه اهلنا
– ايوه يبقي ابن خاله ابن عمك
– ماما متعصبنيش انا استحاله اوافق أن الكائن ده يعيش معانا في نفس البيت وبعدين هو معاه فلوس تشتري بلد بحالها
ماما وهي بتخرط ملوخيه وبتبصلي ببرود :

– تعالي خرطي الملوخيه ديه عشان اعمل للراجل حاجه ترم عضمه كده ده لسه خارج من المستشفي
بلعت ريقي بتوتر وانا بسألها باستغراب :
– م مستشفي!
رفعت راسها وهي بتضحك من تحت لتحت وبتقول بتأثير مصطنع:
– ياحبه عيني الراجل تعب خالص بسبب اللي حصله واتتنقل للمستشفي ولسه خارج
رديت بسخريه:
– ياحرام لا بجد الدمعه هتفر من عيني
بصيتلي وهي بتقول بغيظ:
– انتي هتفضلي تتكلمي كده كتير يالا اخلصي الراجل علي وصول
هبدت رجلي في الأرض وانا بقول بغيظ:
– مش هعمل حاجه وطول ما البني ادم ده هنا مش هيشوف وشي حتي هه
لوت بوقها بسخريه وهي بتقول بتهكم:
– عيني فيه واقول اخيه
رديت بعصبيه:
– انا مش عيني علي حد ده بني آدم خاين وبتاع بنات و…
قطعت جملتي لما الباب اتفتح ودخل اخويا وهو بيسنده
– يارب ياساااتر
قالها اخويا وهو بيتنحنح وبيدخل ومعاه يونس
بلعت ريقي اول ما شوفته وقلبي دق كعادته لما بيشوفه في أي مكان
بصيت لملامحه كان باين عليه التعب فعلا ،وشه خاسس عيونه دبلانه جسمه نزل النص لكن بالرغم من كل ده لسه زي ما هو حلو ووسيم وبيخطفني ويخطف قلبي في كل حالاته
ايه ده هو انا بقول ايه ده طليقي مينفعش اتغزل في شخص غريب
كشرت وشي وانا ببص لاخويا وبقول بغيظ:
– ايه اللي جاب الكائن ده هنا ؟!
اخويا وهو بيبصلي بحده:
– هي دي حمد لله علي السلامه اللي المفروض تقوليها لجوزك ؟!