جوزي طلب مني اسيب بيتي لمده اسبوع

التوقيع ده بتاعي ولا لأ؟! بلع ريقه وقال: — هالة… اهدي بس، وأنا هفهمك كل حاجة. ضحكت من القهر. — أفهم إيه؟! أفهم إن جوزي اللي عشت معاه تمنتاشر سنة كان بيخطط ياخد بيتي؟! ولا أفهم إنك كنت عايز تطردني أسبوع علشان تنفذ خطتك وأنا بعيدة؟

! اتدخل طارق، أخويا، وقال بحزم: — محمود، محدش هيتكلم بصوت عالي. إحنا جايين نفهم الحقيقة، والمستندات اللي قدامنا محتاجة تفسير واضح. محمود بصله بغضب: — وإنت مالك بيني وبين مراتي؟! رد طارق بهدوء: — مالي إن أختي اتعرضت لمحاولة استخدام بياناتها وتوقيع منسوب ليها من غير علمها.

ولو فيه تزوير، الموضوع مش مجرد خلاف زوجي. في اللحظة دي، أبو نجلاء ضــ,,ـــــرب بعصايته على الأرض وقال: — وأنا كمان عايز أعرف بنتي بتعمل إيه هنا، وليه قالتلي إنها رايحة تقعد عند واحدة صاحبتها! لفيت ناحية نجلاء. — يعني حتى أبوكي مكنش يعرف إنك جاية تقعدي في بيتي؟ ! نجلاء بدأت تعيط.

— أنا كنت مضغوطة… ومحمود هو اللي قالي أعمل كده! محمود صرخ فيها: — اخرسي يا نجلاء! لكن أبوها وقف قدامه وقال: — متعليش صوتك على بنتي! هي غلطانة وهتتحاسب على غلطها، بس إنت كمان هتقول الحقيقة. الراجل اللي كان واقف جنب طارق فتح الملف، وعرّف نفسه إنه مستشار قانوني بيتابع بعض معاملات المكتب العقاري اللي ظهر اسمه في الورق.

قال: — قبل أي حاجة، لازم أوضح إن الورقة اللي قدامنا مش عقد بيع نهائي، ومش معناها إن الشقة اتنقلت ملكيتها. دي صورة من طلب تمويل بضمان عقار، واتقدم للمكتب على أساس إن صاحبة الشقة موافقة. حسيت بدوخة. — تمويل بضمان شقتي؟

! يعني إيه؟ رد: — يعني فيه محاولة للحصول على مبلغ مالي كبير، مع تقديم شقتك كضمان. لكن الإجراءات القانونية اللازمة ما اكتملتش، ولما ظهرت ملاحظات على المستندات، المعاملة اتوقفت لحين التحقق. بصيت للورقة تاني. المبلغ المكتوب كان مليون ومتين ألف جنيه! مليون ومتين ألف!

المبلغ ده كان أكبر من كل الفلوس اللي قدرت أحوشها طول حياتي. سألت محمود: — إنت محتاج مليون ومتين ألف جنيه ليه؟! محمود حط إيده على وشه وقال: — علشان كنت داخل في مشروع، والمشروع خسر. طارق سأله: — مشروع إيه؟

محمود سكت. نجلاء فجأة قالت: — قوله يا محمود! قولهم إنك كنت عايز تفتح معرض أثاث باسمي! لفيت ناحيتها. — معرض أثاث باسمك إنتِ؟! قالت وهي بتمسح دموعها: — أيوه… محمود قالي إننا ممكن نبدأ مشروع جديد، وأنا كنت هشارك بفلوس تعويضي بعد الطلاق. أبوها بص لها بصدمة. — تعويض إيه يا نجلاء؟