مصروف البيت ج الاخير
مصروف البيت ج الاخير
وفجأة… بقلم مـنال عـلي
موبايلي في جيبي اهتز ورن بصوت عالي جداً!
رنة الموبايل فاجئته، بص لجيبي بتوتر وقال:
— هاتي الزفت ده!
مد إيده عشان يخطف التليفون…
وفي نفس الثانية، حركت رجلي بكل قوتي ودُست بكعب رجلي على مشط رجله، وبإيدي السليمة مسكت أباجورة المكتب النحاس التقيلة وخبطته بيها بكل غل في كتفه!
حسام صرخ من المفاجأة والوجع ورجع خطوتين لورا:
— يا بنت الـ…!
جريت على باب المكتب، فتحته وخرجت وأنا بصرخ:
— يووووسف! لياااان!
حسام كان ورايا زي التور الهايج، مسكني من طرحتي في الصالة وشدني للأرض.
وقعت على دراعي المكسور… حسيت بشرار طالع من عيني والجبيرة اتخبطت بقوة، بس صرخت وأنا بحاول أقاوم:
— سيبني يا مجرم!
الولاد خرجوا من أوضتهم بيعيطوا بهستيريا.
يوسف صرخ:
— بابا سيب ماما! ابعد عن ماما!
حسام زعق فيه:
— ادخل جوة يا حيوان!
وقبل ما يمد إيده عليا تاني…
الباب الخارجي للشقة اتهز بعنف رهيب، وصوت تخبيط كأنه هيدق الحيطة، وصوت بيهتف من برة بصوت جهوري:
— افتح يا حسام! افتح البوليس معاك! افتح بدل ما نكسر الباب!
حسام اتصلب مكانه.
وشه اصفر، وبقى لونه زي الجير.
بص للباب برعب، وبصلي:
— إنتي طلبتي البوليس؟! إمتى؟!
التليفون اللي كان واقع على الأرض جنبنا كان مفتوح على سبيكر… وصوت ست بيتكلم ببرود:
— لأ يا حسام… مش هي اللي طلبت البوليس، أنا اللي طلبتهم.
أنا شيريهان.
كنت عارفة إنك غدار، وحاطة جهاز تتبع في الشنطة وبلغت عن تسليم الفلوس وشحنتك، وجبتلهم تسجيلاتك… عشان لو مش هكون شريكتك، تبقى نهايتك في السجن!
حسام اتجنن، جري على أوضة المكتب عشان يلحق الفلوس ويهرب من المنور، بس في لحظتها…
الباب الخارجي اتكسر!
قوة من مباحث الأموال العامة ورجال الشرطة اقتحموا الشقة في ثواني!
— اثبت مكانك! متتحركش!
حسام اتسمر وهو رافع إيديه، الدموع والذل في عينيه وهو شايف الأغلال بتتحط في إيده.
الظباط دخلوا أوضة المكتب، طلعوا شنطة الدولارات، والباسبور المزور، والمستندات.
جريت وضميت يوسف وليان في حضني وأنا بنهار من البكاء… بكاء مش وجع، بكاء خلاص! بكاء ولادة جديدة بعد سنين من القهر والخوف.
رئيس المباحث بصلي باحترام لما شاف الجبيرة وقال:
— حمد الله على سلامتكم يا مدام. البلاغ كان جاي من شريكته، وموبايلك اللي اتفتح كان مسجل كل كلمة قالها من شوية… كتر خيرك إنك صمدتي، ده مجرم ونصاب دولي ومطلوب في كذا قضية توظيف أموال وتهريب.
