سما ج الاخير

تاني يوم...يوم كتب الكتاب.. البيت كله كان مشغول في التجهيزات.. زينب ومها في المطبخ بيجهزوا الأكل.. وجنا كانت راحه جايه في الشقه بتوتر... جنا: يا جماعه حد يقولي أعمل ايه..حاسه إني نسيت حاجه. هنا ضحكت وقالت: انتي من الصبح بتقولي كده. مريم: اقعدي يا بنتي شويه..كل حاجه جاهزه. جنا: مش قادره والله. مريم كانت عماله تنقل حاجات وتساعدهم.. زينب: يا بنتي متتحركيش كتير. مريم: طب أساعد بأي حاجه. زينب: لا..اقعدي مع جنا وخلاص. الباب خبط.. ياسين دخل وهو شايل شوية أكياس.. ياسين: صباح الخير. الكل: صباح النور. مها: جبت كل حاجه؟ ياسين: أيوه يا ماما..الورد..والحلويات..وكل اللي طلبتيه. جنا بابتسامه: ربنا يخليك يا ياسين. ياسين: ألف مبروك يا عروسه. جنا ضحكت: الله يبارك فيك. مريم قامت عشان تاخد منه كيس.. ياسين سحب الكيس بسرعه وقال: لا. مريم: هساعدك..بس.. ياسين: لا متشليش تقيل.. مريم: طيب..انت حر.. هنا كانت واقفه بتبصلهم وابتسمت بخبث بعد شويه... كل واحد كان بيجهز نفسه عشان يروح القاعه. جنا كانت واقفه قدام المرايه بتعدل الطرحه. مريم وقفت جنبها وقالت بابتسامه: شكلك توحفه يا جوجو.. جنا حضنتها وقالت: عقبالك. مريم ابتسمت بس من غير ما ترد. >>>>>>>>>>>>>>> بعد ما وصلوا القاعه... المعازيم بدأوا يوصلوا واحد ورا التاني... كريم كان بيسلم على الناس... وفي نفس الوقت دخل شاب ..كريم ابتسم أول ما شافه. كريم: حبيبي يا عمرو..نورت. عمرو حضنه وقال: ألف مبروك يا صاحبي. كريم: الله يبارك فيك. في الناحيه التانيه...هنا كانت واقفه مع مريم.. هنا رفعت عينيها بالصدفه...واتفاجأت. هنا بصوت واطي: يا نهار أبيض... مريم: مالك؟ هنا وهي باصه قدامها: ده...ده بتاع القهوه مريم بصت ناحيته وقالت: مين؟ هنا: اللي خبطت فيه في الكافيه. في اللحظه دي كريم نادى عليهم. هنا راحت هي ومريم. كريم بابتسامه: أعرفكم...ده ابن خالي عمرو. عمرو أول ما شاف هنا ابتسم وقال: إحنا اتقابلنا قبل كده. هنا ضحكت بإحراج: أيوه...بس كانت بدايه مش لطيفه. عمرو: بالعكس...أنا فاكرها كويس. كريم باستغراب: هو في ايه؟ عمرو قال: احنا زمايل في الكليه وهنا ابتسمت وقالت: ايوه... >>>>>>>>>>>>> مريم كانت واقفة لوحدها شوية عند الترابيزة وماسكة كوب العصير.. قرب منها شاب من معازيم العريس وقال بابتسامة: لو سمحتي...هو انتي أخت العروسة؟ مريم : اه. تشرفت...أنا سامح ابن عم العريس. مريم: أهلاً. سامح: انا شفتك كزا مره..قبل كده مريم : اه طبيعي. سامح: انتي شغالة؟ مريم: ليه.. سامح: يعني يشرفني نتعرف أكتر لو معندكيش مانع... مريم اتوترت وقالت: معلش... ياسين قرب منهم وقاطعها وقال بهدوء:مريم...تعالي دقيقة.. الشاب بصلهم باستغراب. مريم بصت لياسين وقالت: نعم؟ ياسين: عايزك في موضوع.. مريم: دلوقتي؟ ياسين: اه دلوقتي. مريم بصت للشاب وقالت: عن اذنك.. ومشيت مع ياسين... مريم بضيق: كنت عايز إيه؟ ياسين: ولا حاجة. مريم باستغراب: أمال قطعت كلامي ليه؟ ياسين: مكنتش مرتاح. مريم: مرتاح من إيه؟ ياسين: إنه واقف معاكي وبيكلمك. مريم بصتله بزهق وقالت: وده بقى من حقك؟ ياسين: لا...بس مقدرتش أشوفه بيكلمك وأسكت. مريم: اه طيب..وسبته وطلعت.. ياسين اتنهد وراح وراها.. مريم قعدت بره القاعه علي كرسي.. ياسين: ايه اللي طيب..مشيتي وليه واحنا بنتكلم؟ مريم: معتش في حاجه نتكلم فيها.. ياسين: لا ده فيه كتير اوي.. مريم بصتله وقالت : عايز ايه يا ياسين.؟ ياسين اتنهد وقال: مش عايز نفضل كده.. مريم: بس انت اللي عملت كده...سبتيني في اكتر كنت ضمناك فيه..خلفت بوعدك..سافرت ورمتني ورا ضهرك..مفكرتش ليه فيا...بلاش انا عقلك صورلك انك لما ترجع هتلاقيني مستيناك مثلا.. ياسين: انا عارف اني غلطت..ومعاكي حق في ده كله..بس مسألتيش نفسك انا عملت كده ليه..!! يتبع.. مريم: مهما كان السبب..مش هيمحي اللي عملته. ياسين اتنهد وقال: - بعد ما أبويا مات...أنا سافرت عشان أخلص شغل الشركة اللي كان سايبه. مريم بصتله باستغراب وسكتت. ياسين: لما وصلت...اكتشفت إن شريك أبويا كان مخبي عننا مصايب...وأوراق الشركة كلها فيها مشاكل. مريم: وبعدين؟ ياسين: اتفتح تحقيق...واتهموني إني المسؤول...وكنت كل يوم مستني قرار حبسي. مريم اتصدمت وقالت: - إيه؟! ياسين: قعدت شهور بجري بين المحامين والمحاكم...وفي الآخر الحكم نزل بغرامة كبيرة...لو مكنتش دفعتها...كنت هدخل السجن. مريم بصتله بعدم تصديق وقالت: - ليه...ليه مقولتليش؟ ياسين ابتسم بوجع وقال: - أقولك إيه؟ أقولك استنيني وأنا مش عارف هطلع منها ولا لأ؟ ولا أقولك استنيني وأنا ممكن أفضل سنين هناك؟ مريم: كنت على الأقل سيبتلي حق الاختيار. ياسين: كنت عارف إنك لو عرفتي...هتفضلي مستنياني...وأنا مكنتش ضامن هرجع أصلًا...فاخترت تكرهيني...أهون عندي من إني أربطك بواحد مستقبله كان بيضيع قدام عينيه. مريم: وانت فاكر إن اللي عملته كان أهون؟ ياسين بص في عينيها وقال بهدوء: - لا...بس كان الحل الوحيد اللي شوفته وقتها. - مريم بصتله وسكتت ثواني...وبعدين قالت: كان ممكن تقولي...كنت هقف جنبك. ياسين :وكنت هسمحلك تستني واحد ممكن ميعرفش يرجع؟ كنت هربطك بيا ليه؟ مريم: بس انت أخدت القرار لوحدك...مكنتش من حقك. ياسين: معنديش اعتراض...أنا غلطت لما حرمتك من حقك تعرفي...بس وقتها مكنتش شايف غير إن دي الطريقة الوحيدة أحميكي بيها. مريم: تحميني؟! انت كسرتني يا ياسين. ياسين نزل بعينه وقال: عارف...وعشت كل يوم بندم على اللحظة دي. مريم: ولما خلصت مشاكلك...رجعت افتكرتني؟ ياسين: ولا يوم نسيتك...كل يوم كنت بفكر فيكي...وكل مرة كنت أقول هرجع ألاقيكي نسيتي...وده حقك. مريم اتنهدت وقالت:تعرف أصعب حاجة كانت إيه؟ ياسين: إيه؟ مريم: إني فضلت أدور على غلطة عملتها...أقول أكيد أنا السبب...أكيد أنا قصرت...وأنا أصلاً مكنش ليا ذنب. ياسين قرب منها خطوة وقال: - لا...والله ما كان ليكي أي ذنب...الذنب كله ذنبي. مريم: أنا محتاجة وقت يا ياسين...وقت افكر واشوف هعمل ايه ياسين هز رأسه وقال:وأنا هستناكي يا مريم..هستناكي لحد اخر يوم في عمري.. في اللحظة دي خرجت هنا من القاعة وهي بتدور عليهم وقالت: يا جماعة...العريس والعروسة بيدوروا عليكم...يلا بسرعة.. بعد ما دخلوا القاعة... هنا بصت لمريم وقالت: انتي كويسة؟ مريم ابتسمت ابتسامة باهتة وقالت: اه. هنا بصتلها باستغراب...كانت عارفه إن فيه حاجه حصلت برا...بس مسألتهاش. كتب الكتاب خلص...والكل بدأ يبارك للعروسين... كريم حضن جناوهو مبسوط...والكل كان بيصور ويضحك. مريم كانت واقفة بعيد شوية بتتفرج عليهم...وهي مبتسمة.. ياسين كان واقف على الناحية التانية...وعينه عليها من بعيد. بعد شوية... مها: يا جماعة يلا...هنصور صورة عائليه.. جنا بصت حواليها وقالت: مريم...تعالي هنا جنبي. مريم راحت وقفت. ياسين كان واقف بعيد... حسن قال: - يا ياسين...واقف بعيد ليه؟ انت مش من العيله ولا ايه.. ياسين راح وقف... الاتنين بصوا لبعض بسرعة...وبعدين كل واحد بص الناحية التانية. وبعد ما خلصوا... مريم كانت ماشية ناحية الباب... ياسين ناداها بهدوء:مريم... وقفت من غير ما تبصله. ياسين: مش هطلب منك تسامحيني دلوقتي...ولا حتى تصدقيني...بس أوعدك بحاجة. مريم لفتله وقالت: إيه هي؟ ياسين: عمري ما هسيبك من غير ما تعرفي الحقيقة تاني...ولا هخبي عنك أي حاجة...ولو احتجت أستنى عمري كله عشان تسامحيني...هستنى. مريم فضلت باصاله ثواني...وقالت بهدوء: - الكلام سهل يا ياسين...لكن الثقة...هي اللي صعبة ترجع. ياسين هز رأسه وقال: عارف...وعشان كده مش هتكلم تاني...هخلي أفعالي هي اللي تتكلم. مريم بصتله نظرة طويلة...وبعدين لفت ومشيت... وياسين فضل واقف مكانه...وهو لأول حس ان فيه أمل ان مريم تسامحه.. >>>>>>>>>>>>> تاني يوم الصبح... مريم...خرجت من أوضتها وهي لابسة هدوم الشغل. زينب: صباح الخير يا حبيبتي. مريم: صباح النور يا ماما. زينب: هتروحي الشغل؟ مريم: أيوه...كفاية قعدة في البيت. زينب: طب افطري الأول. مريم: حاضر. في نفس الوقت... الباب خبط... زينب: افتحي يا مريم. مريم راحت فتحت الباب...اتفاجئت بياسين واقف. مريم باستغراب: خير؟ ياسين ابتسم وقال: صباح الخير. مريم: صباح النور. ياسين رفع كيس صغير وقال: - خالتو قالتلي امبارح إن الدكتور كتبلك الدوا ده...الصيدلية اللي جنبكم مكانش عندها...وأنا لقيته وجبته وأنا راجع. مريم سكتت شوية وقالت: - كان ممكن بابا يجيبه. ياسين: عارف...بس أنا كنت معدي من هناك...قولت أجيبه وخلاص. زينب خرجت من المطبخ وقالت: - يا أهلا يا ياسين...تعبت نفسك ليه يا ابني؟ ياسين: ولا أي تعب يا خالتو. زينب أخدت الدوا وقالت: - ربنا يباركلك. ياسين ابتسم وقال: - أنا همشي بقى عشان متأخرش على الشغل. وقبل ما يمشي بص لمريم وقال: - خلي بالك في الشغل..متتعبيش نفسك.. مريم اكتفت إنها تهز رأسها. ياسين نزل... مريم فطرت و أخدت شنطتها ونزلت. أول ما خرجت من العمارة...اتفاجئت إن ياسين لسه واقف جنب عربيته. مريم باستغراب: - أنت لسه هنا؟ ياسين: مستني عشان اوصلك .. مريم: لا انا..هركب تاكسي. ياسين قال: طب ما أوصلك... ده نفس الطريق. مريم بصتله ثواني...وبعدين قالت: لا...متشكرة. ياسين ابتسم وقال: تمام...براحتك. ووقفلها تاكسي.. مريم ركبت...والتاكسي مشي. أما ياسين فبص للعربية وهي بتبعد...واتنهد وقال لنفسه: - براحتك يا مريم...المهم إنك ترجعي تثقي فيا...حتى لو هياخد العمر كله. >>>>>>>>>>>>>>> - بعد حوالي نص ساعة... مريم وصلت الشركة.... سالي زميلتها: صباح الخير يا مريم. مريم: صباح النور. سالي: عامله ايه دلوقتي؟ مريم ابتسمت ابتسامة خفيفة وقالت: الحمد لله..احسن سالي: طب الحمدلله..مستر أحمد بيدور عليكي. مريم: حاضر هروحله.. دخلت مكتب أحمد... أحمد: صباح الخير يا مريم. مريم: صباح النور يا فندم. أحمد: عندنا عميل مهم النهارده...وعايز الملف يكون جاهز قبل الساعة واحدة. مريم: حاضر. خرجت من المكتب...وقعدت تشتغل. بعد شوية... تليفونها رن. بصت في الشاشة...كان رقم ياسين. فضلت ثواني تبص للموبايل...وبعدين قفلت الرنة. بعد دقيقة...وصلت لها رسالة. ياسين: "مترديش...أنا بس كنت عايز أطمن إنك وصلتي." مريم فضلت باصة للرسالة شوية... وبعدين كتبت:"وصلت." بعد ثواني... ياسين: تمام.. مريم ابتسمت من غير ما تحس...وقفلت الموبايل وكملت شغلها. سالي كانت واقفة بعيد ولاحظت ابتسامتها. سالي وهي بتضحك: - هو مين اللي خلاكي تبتسمي كده؟ مريم اتوترت بسرعة وقالت: - مفيش...رسالة شغل. سالي: اممم...أكيد. مريم خبت ابتسامتها و وقالت:سبيني اركز بقي.. سالي ضحكت وقالت: ركزي ياختي.. "أما مريم فبصت للموبايل مرة تانية...وحست إن لأول مرة من سنين...ردت على ياسين من غير غضب" >>>>>>>>>>>>>>>>>>>>>>>>> بعد ما خلصت شغل...رجعت البيت..ودخلت أوضتها.. بعد شوية...سمعت خبط على الباب. هنا: يا مريم...صاحية؟ مريم: ادخلي..انتي جاتي امتي؟ هنا: من شويه كنت قاعده مع جنا..وفضلت بصالها.. مريم باستغراب: مالك؟ هنا: من يوم كتب الكتاب وأنا عارفة إن فيه حاجة حصلت بينك وبين ياسين. مريم بصتلها وسكتت. هنا: هتحكيلي...ولا هتفضلي ساكته؟ مريم اتنهدت وقالت: حكالي سبب سفره. هنا بصتلها باهتمام وقالت: وقالك إيه؟ "مريم بدأت تحكيلها كل اللي قاله...عن مشاكل الشركة...وشريك أبوه...والتحقيق...والغرامة...وإنه كان ممكن يدخل السجن...وإنه اختار يبعدها عشان ميظلمهاش معاه." بعد ما خلصت...فضلت هنا ساكتة شوية. مريم: قولي...إيه رأيك؟ هنا اتنهدت وقالت: رأيي.. أنا لا هقولك سامحيه...ولا هقولك سبيه مريم بصتلها باستغراب. هنا: بس الحقيقة إنه غلط...وغلطته كبيرة...وفي نفس الوقت واضح إنه كان شايل همك بطريقته...حتى لو كانت الطريقة دي غلط. مريم: بس هو خد القرار لوحده...مكنش من حقه. هنا هزت رأسها وقالت: معاكي حق...بس برضو انتي دلوقتي عرفتي الحقيقة...والقرار في الآخر قرارك إنتِ. مريم : المشكلة إني مش عارفة أكرهه زي الأول...وفي نفس الوقت مش قادرة أسامحه.. هنا : وده طبيعي...الثقة لما بتتكسر مبتترجعش في يوم وليلة... مريم سكتت... هنا: متستعجليش أي قرار...سيبي الأيام هي اللي تحكم.. مريم هزت رأسها بهدوء...بعد ما هنا خرجت.. فضلت مريم قاعدة مكانها... افتكرت كل كلمة قالها ياسين... "ولأول مرة...حست إنها مش بتفكر فيه بغضب...لكن بحيرة." >>>>>>>>>>>> في اليوم اللي بعده...تليفون هنا رن... هنا: الو يا عروسة. جنا: انتي فين؟ هنا: في البيت...خير؟ جنا: يلا البسي بسرعة...أنا وكريم هننزل نجيب باقي حاجات الفرح...وعايزاكي تيجي معايا. هنا:هو لسه فيه حاجات تانيه.. جنا: أيوه يا ستي...قماشه الطرحه. ولسه هنتفق على بوكيه الورد بتاعي...وكمان كام حاجة صغيرة. هنا: طب عشر دقايق وأكون جاهزة. جنا: متتأخريش بقى...إحنا مستنيينك تحت. هنا: حاضر يا ستي...جاية. قفلت المكالمة... وقامت بسرعة تجهز نفسها...وبعد شوية نزلت تحت العمارة... لقيت كريم واقف مستني بعربيته...وجنا واقفة جنبه.. هنا: اتأخرت؟ جنا: لا لسه...إحنا يدوب نزلنا. كريم : يلا اركبوا. هنا فتحت الباب لقت عمرو في وشها..اتجمدت مكانها.. عمرو ابتسم وقال: ازيك يا هنا.. هنا بابتسامة: الحمد لله تمام.. جنا ركبت جنب كريم...وهنا ركبت في الكرسي اللي ورا جنب عمرو.. >>>>>>>>>>>>>> ياسين بدأ يدي لمريم مساحه مبقاش بيبعت كتير..ولا بيضغط عليها.. مريم كانت فاكره انها كده مرتاحه..لكن مع مرور الوقت... كانت كل شوية تمسك موبايلها من غير سبب... تفتح الواتساب...وتقفل تاني. وتلاقي نفسها بتبص على آخر شات بينهم. كل مرة كانت تقول: "أنا أصلاً مش مستنية منه حاجة." لكنها كانت بترجع تبص للموبايل من جديد. لحد ما في يوم...الموبايل نور بإشعار.. قلبها دق من غير ما تحس... مسكته بسرعة...ولما بصت في الشاشة...كان ياسين.. قفلت الموبايل وحطته جنبها وقالت: اتقلي متبقيش كأنك مستينه رسالته..بس دقيقه و فتحت الرسالة... ياسين: "بكرة معاد الدكتور...متنسيش." مريم فضلت باصة للرسالة ثواني...واتفاجئت إنه لسه فاكر...ابتسمت من غير ما تحس... وبعدين كتبت:"مش ناسية...شكراً." بعد ثواني...وصلها منه رد. "كويس انك فاكره" مريم فضلت باصة للمحادثة شوية...وقالت: بس كده..مش هيبعت تاني.. وقالت لنفسها بهدوء: "هو فعلًا بقى بيديكي المساحة اللي طلبتيها..بس انا مش مرتاحه ليه؟..بس مش انتي اللي قوليتله!!..يوه بقي" يتبع مريم: يا هناا..انتي فين؟ هنا: انا في الاوضه..بلبس وجايه.. مريم: طيب هستناكي هنا.. مها كانت خارجه من المطبخ وشايله مشروب سخن في ايديها.. مريم: ازيك..يا عمتو انتي تعبانه ولا ايه؟ مها: الحمد لله يا حبيبتي..لا ده لياسين تعبان شويه.. مريم حست بقلق وقالتلها: هاتي وانا اوديهوله..يا عمتو.. مها: خدي يا حبيبتي.. مريم راحت عند الاوضه وخبطت.. ياسين: تعالي يا ماما.. مريم: ممكن ادخل؟ ياسين بص بسرعه وقال: ايه ده مريم..تعالي اتفضلي.. مريم: اتفضل الكوبايه اهيه.. ياسين: تسلمي..تعبتي نفسك. مريم: ولا تعب ولا حاجه..عمتو قالت انك تعبان..قلت اشوفك.. ياسين: اه شويه برد..قرر يجيلي في عز الحر.. مريم ضحكت وقالت: احسن عشان تبقي تسمع كلام عمتو.. ياسين فضل باصصلها وابتسم وقال: تعرفي دي اول مره تضحكيلي من ساعه ما رجعت.. مريم اتكسفت وشاورت علي الكوبايه وقالتله: اشربه قبل ما يبرد..انا طالعه.. وطلعت وكانت هتقفل الباب بس فتحته تاني وقالت: سلامتك.. وقفلت الباب.. ياسين مسك الكوبايه وهو مبتسم.. >>>>>>>>>>>>>> جنا: هااه عملتوا ايه؟ مريم: انا رحت وجبت كل الحاجات الباقيه اهيه.. هنا: وانا جبت الطلبات بتاع المطبخ كلها.. جنا: طب وحجزتوا الفساتين ليكوا.. هنا: اه مريم جاتلي امبارح وروحنا حجزناهم.. جنا: طيب كويس..انا هنزل عشان راحه انا وكريم كام مشوار كده.. زينب: طيب.. مها: بقولك ايه هنا رني علي اخوكي..وقوليله ييجي هنا بعد الشغل..عشان محتاجينه.. هنا: مش معايا رصيد..رني عليه يا مريم.. مريم: حاضر..ومسكت الموبايل ورنت عليه.. بعد ثواني..ياسين رد ياسين: الو يا مريم.. مريم: الو يا ياسين..عمتو قالتلي ارن عليك عشان تيجي بعد الشغل.. ياسين: حاضر هاجي.. مريم سكتت ثواني وقالتله: انت بقيت عامل ايه دلوقتى؟ ياسين ابتسم وقال: بقيت احسن الحمد لله.. مريم: تمام..مع السلامه.. ياسين: سلام... بعد شويه كان ياسين وصل وخبط الباب..هنا فتحتله.. مريم كانت جايه من اوضتها ولابسه بيجامه وبشعرها...ياسين شافها وقال بتوتر: انا داخل عند امي ومشي بسرعه.. مريم وقفت مصدومه..وهنا فضلت تضحك جامد.. مريم: مش تقولي يا بنتي..ينفع كده مش مسرحه شعري.. هنا ضحكت وقالت: ده اللي فارق معاكي.. >>>>>>>>>>> كلهم كانوا متجمعين.. مريم: ايه يا جماعه ده..الفرح بكره قومي يا هنا هاتي الصب اما نشغل اغاني.. هنا جابت الصب وشغلوا اغاني..وفضلوا يرقصوا ويسقفوا.. " وياسين باصص علي مريم وعمال يضحك عشان هي بترقص بأيد واحده مش عارفه ترقص من الجبس " بعد شويه زينب: اقعدوا بقي كفايه.. مريم وهي بتهوي بإيدها: يووه انا حرانه اوي..هطلع في البلكونه.. ياسين: هتاخدي برد كده.. مريم هزت رأسها وقعدت جنب هنا ومطلعتش..هنا غمزتلها وقالت بصوت واطي: الواد مهتم وكده.. مريم ابتسمت وقالت: بس يا بت.. هنا: الدنيا احلوت خالص.. مريم خبطتها بكوعها.. هنا: اااه..بقي كده.. جنا: هنا بقولك.. هنا: نعم.. جنا: كريم نسي معايا حاجه وبعت عمرو ياخدها..انزلي ايديهاله.. هنا: اشمعنا انا بقي.. جنا: انتي اللي لابسه انا لسه هلبس..يلا هنا: هاتي يختي.. هنا نزلت تحت عند العماره..لقت عمرو واقف وساند علي العربيه..حست ان قلبها دق لما شافته.. عمرو لما شافها ابتسم..هنا راحت ناحيته.. هنا: ازيك يا عمرو.. عمرو: تمام الحمد لله..انتي عامله ايه؟ هنا بابتسامة هاديه: الحمد لله بخير..دي الحاجه اللي كريم عايزها.. عمرو: تمام.. هنا: تمام ولسه هتلف وتمشي.. عمرو: عملتي ايه في النتيجه صحيح؟ هنا: الحمد لله نجحت وجبت امتياز.. عمرو بابتسامة: مبروك..نتقابل في حفله التخرج بقي.. هنا: ان شاء الله...سلام..ومشيت عمرو: سلام..وفضل متابعها بعينه وهي داخله العماره وهو مبتسم >>>>>>>>>>>>>>> يوم الفرح.... هنا: يلا يا مريم..ياسين مستنينا تحت عشان يوصلنا.. مريم: حاضر..استني عشان منساش حاجه.. هنا: جبتي الطرحه والبرفيوم والاكسسوارات. مريم: اه عبيت كله يلا بينا..عشان منتأخرش علي جنا.. ونزلوا لياسين ياسين: بقالي ساعه مستني.. مريم: وايه يعني..اما تستني ساعتين وتلاته واربعه.. ياسين ضحك وقال: اه اصلي السواق بتاعكوا.. مريم: مش بالظبط.. ياسين: طب تمام..اركبوا بقي عشان مسيبكوش وامشي.. مريم: امشي كده.. ياسين: يا مريم اركبي..مش ناقص فرهده.. مريم ضحكت وقالت: حاضر.. وصلوا المكان ونزلوا من العربيه.. هنا وهي بتشيل الشنط : مريم.. مريم: نعم.. هنا: فين الهيلز بتاعك؟ مريم سكتت وبصتلها.. هنا: اوعي يكون اللي في بالي صح.. مريم هزت رأسها وقالت: نسيته.. هنا: اقول ايه بس..طب هتعملي ايه.. مريم بصت لياسين وقالت: ياسين عمره ما هيخذلني.. ياسين: قولي انتي عايزه ايه.. مريم: توديني اجيبه ونيجي.. ياسين: مش لازم هيلز.. هنا: يا ياسين انت عارف يعني ايه هيلز الاول..ده اللي هتلبسه في رجلها.. ياسين: بجد..طب اركبي يا مريم.. مريم ابتسمت وقالت: كنت عارفه انك مش هتبيعني.. ياسين مركز في السواقه.. مريم: هتلبس بدله لونها ايه؟ ياسين: خمني كده.. مريم: اسود.. ياسين ضحك وقال: ايه ده عرفتي ازاي؟ مريم: انت بتحب الاسود في البدل مش بتغيره.. ياسين بصلها وقال: انتي لسه فاكره؟ مريم : ايوا.. ياسين: طب وانتي الفستان بتاعك لونه ايه.. مريم: خليها مفاجأة.. ياسين: انتي علطول تعمليها فيا.. مريم ضحكت وقالت: بحب اشوفك متفاجئ..بتعجبني رد فعلك.. ياسين بصلها وهو مبستم..وهي كمان بصتله..بس موبايل ياسين رن..مريم نزلت عنيها بسرعه وبصت من الشباك.. ياسين رد علي الموبايل..بعد ما قفل قالها.. ياسين: شفتي اخرتيني علي الحلاق.. مريم بصتله وقالت: فدايا.. ياسين ضحك وكمل سواقه.. " ولاول مره كانوا بيتكلموا وهما علي طبيعتهم وكل واحد فيهم حس انه لقي في التاني اللي كان عايز يشوفه..مريم بدأت تسامحه ومبقتش تكتم مشاعرها وياسين حس ان مريم اللي يعرفها رجعت" >>>>>>>>>>>>>>> في القاعه.. مريم: يا هنا استني مش عارفه امشي بالهيلز.. هنا: يا بنتي مدي عشان نلحق نرمي عليها الورد.. مريم كان بتحاول تمشي بسرعه كانت هتقع..ياسين لحقها ومسكها من ايديها.. مريم رفعت عنيها ولقت ياسين ابتسمت.. ياسين: امشي براحه.. مريم: عايزه الحق عشان هنرمي علي جنا ورد.. ياسين مدلها دراعه وقالها: امسكي في دراعي.. مريم بصتله وهي متردده.. ياسين ابتسم وقالها: امسكي متخافيش.. مريم مسكت في دراعه..ومشيت معاه.. " جنا وكريم دخلوا القاعه وهما ماسكين ايد بعض ومبسوطين..وهنا ومريم رموا عليهم ورد وياسين فضل واقف جنب مريم طول الفرح " مريم: هاتلي بقي يا ياسين انا جعانه.. ياسين: عايزه تاكلي ايه يا مريم؟ مريم: هات طبق كبير وحط فيه من كل حاجه.. ياسين ضحك وقال: انتي عايزه الناس تضحك عليا.. مريم: ياياسين بقي.. ياسين: طيب هشوف.. مريم ابتسمت وقالت: ايوا كده.. هنا كانت ماشيه وعماله تمسح في الفستان..وكانت هتخبط في عمرو بس وقفت عمرو: اهلا هنا.. هنا: ازيك يا عمرو.. عمرو: مالك في مشكله؟ هنا: الفستان وقع عليه..حته تورته.. عمرو: مش باين اوي وطلع علبه مناديل وقالها: خدي مناديل نضفيه.. هنا بابتسامة: شكرا يا عمرو.. عمرو: العفو.. هنا: عن اذنك هروح..الحمام عشان انضفه.. عمرو: تمام... ياسين جاب طبق وجه: اتفضلي.. مريم ابتسمت وقالت: برافو عليك.. ياسين: اي خدمه.. " خلص الفرح وكل واحد روح بيته..اللي هيكمل في حياته بشكل طبيعي..واللي هيبدأوا حياتهم مع بعض..واللي هيدوا فرصه تانيه لبعض..واللي لسه حكايتهم هتبدأ" >>>>>>>>>>>>> يوم التخرج بتاع هنا.. كلهم كانوا معاها ومبسوطين بيها.. ياسين: الف مبروك يا هنون وحضنها..واداها بوكيه ورد.. هنا: الله يبارك فيك يا حبيبي.. مريم بفرحه: الف مبروك يا روحي..واديتها بكس كتير في هدايا.. وفي اللحظه دي عمرو جه..وسلم عليهم عمرو: مبروك يا هنا.. هنا بابتسامة: الله يبارك فيك.. عمرو: انا كنت عايز اتكلم في حاجه وحسيت ان ده الوقت المناسب..انا عايز اخد ميعاد واطلب ايد هنا علي سنه الله ورسوله.. هنا قلبها فضل يدق جامد..وفرحت اوي.. كلهم رحبوا بيه.. ياسين: تنور يا عمرو..وانا مش هلاقي احسن منك لهنا اختي.. عمرو بابتسامة: شكرا يا ياسين.. ياسين: تقدر تنورنا الخميس الجاي.. عمرو بابتسامة: ان شاء الله... وكلهم بدأوا يباركوا لهنا اللي كان باين عليها انها مبسوطه.. مريم كانت بتتصور مع هنا..وياسين واقف في جنب مريم لاحظته وراحتله.. مريم: ايه يا ياسين بتفكر في ايه؟ ياسين: فينا يا مريم.. مريم: مش فاهمه.. ياسين: يعني يا مريم..انتي قلتيلي سيبلي مساحه سيبتلك..ومضغطتش عليكي..ولاحظت انك رجعتي شبه الاول وبنتعامل عادي..فأفهم من ده ايه؟ مريم سكتت ثواني وابتسمت وقالت: اني سامحتك.. ياسين بفرحه: انتي بتتكلمي جد؟ مريم هزت رأسها وقالت: ايوا..انتي قلتلي هسيب الايام تثبتلك..وثبتتلي فعلا..انا لو مرضتش ارجعلك يا ياسين هبقي محبتكش..هبقي الخسرانه مش انت.. ياسين كان بيسمع كلامها و الابتسامة ماليه وشه.. مريم كملت:انت عملت عشاني كتير اوي..يعني يمكن اللي حصل ده حصل عشان يثبتلي انك بتحبني بجد..احنا ملناش غير بعض يا ياسين...وانا وانت مش هنعرف نحب إلا بعض.. ياسين بابتسامة: انا بحبك اوي يا مريم..انتي اغلي حاجه في حياتي..ووعد مني اني افضل طول عمري احبك..ومش هتخلي عنك ابدا.. مريم: وانا واثقه من ده.. "ومن بين كل النهايات... كانت دي البداية اللي كانوا مستنينها من سنين" " الخذلان من الشخص اللي بنبقي بنبني عليه حياتنا صعب...ومفيش سبب يخيلنا نسامح..بس في افعال ومواقف تخلينا نسامح..الفرصه التانيه بتنفع بجد وبتصلح غلطات بس مع الشخص الصح ..اللي بيحب بجد...اللي مش بيقول انا ندمان ..وسامحيني بس الشخص اللي يثبت ده.. بأفعاله...ويبقي شاري لاخر لحظه" "تمت" بفضل الله يارب تكون عجبتكوا حبيت انها تكون خفيفه وتوصل رساله..واستنوا قصص جديده إن شاء الله ♡ #ر

مقالات ذات صلة

حسام بيه ٢

الام الغنيه

قناع العجوز وثمن الخيانه حكايات شروق خالد

تضحيه اخواتي بقلم اماني السيد

هاجر قطب

متى كانت ليلة القدر 2025؟.. تحري العلامات في الليالي الأخيرة من رمضان بالصور

اترك تعليقاً إلغاء الرد