خلاف المرتب منال علي ج الاخير
خلاف المرتب منال علي ج الاخير
دخلت الشقة وأنا عامل نفسي لسه طالع من السلم، رغم إن قلبي كان بيدق بعنف من اللي سمعته.
ياسمين أول ما شافتني قفلت المكالمة بسرعة.
ابتسمت وقالت: ـ جيت بدري النهارده؟
بصيت في وشها أحاول أعرف كانت بتكلم مين.
قلت: ـ أيوه… الشغل خلص بدري.
سكتت ثواني وقالت: ـ هعملك شاي؟
هزيت راسي بالموافقة، لكن دماغي كانت في حتة تانية.
طول القعدة كنت مستنيها تقول أي حاجة عن المكالمة.
لكن ولا حرف.
وفي الآخر مقدرتش أمسك نفسي.
قولتلها: ـ كنتِ بتكلمي مين؟
بصتلي باستغراب.بقلـم حكايات منـال علي
ـ صاحبتي.
ـ أنهي واحدة؟
قالت اسم صاحبتها “نهى”.
قلت بسرعة: ـ وبتقوليلها ليه إنك هتطلبي الطلاق؟
اتجمدت مكانها.
واضح إنها فهمت إني سمعت جزء من الكلام.
قعدت على الكرسي وقالت بهدوء: ـ كنت واقف تسمعني؟
قلت: ـ لا… سمعت بالغلط.
تنهدت وقالت: ـ أيوه… قلت الكلمة دي… لأني كنت مخنوقة، مش لأني فعلاً بدأت إجراءات طلاق.
أول مرة من أيام أحس إني اتنفست.
لكن لسه فيه غصة جوايا.
قلت: ـ يعني مش عايزة تطلقي؟
ردت من غير تردد: ـ لو كنت عايزة أطلق، كنت عملتها. أنا بحارب عشان جوازنا يكمل… بس مش على حساب نفسي.
الجملة دي خلتني أسكت.بقلـم حكايات منـال علي
لأول مرة أحس إنها هي كمان تعبانة.
قالت وهي باصة في الأرض: ـ كريم… أنت طول الوقت بتكلمني عن بيت أهلك، وبتقارن بيني وبين مامتك. عمرك سألت نفسك أنا اتربيت إزاي؟
سكت.
كملت: ـ بابا كان بياخد مرتب ماما كله كل شهر… وكانت كل ما تحتاج جنيه تطلبه منه. ولو اشترت حاجة لنفسها، يقعد يحاسبها. كانت عايشة حاسة إنها موظفة عنده، مش شريكة حياته.
رفعت عينيها وبصتلي.
ـ وأنا من وأنا صغيرة وعدت نفسي إن عمري ما هعيش التجربة دي.
الكلام نزل عليّ زي الصاعقة.
دي أول مرة تحكيلي الحكاية دي.
قلت بهدوء: ـ ليه ماقولتيليش من الأول؟
ابتسمت ابتسامة كلها وجع.
ـ لأنك عمرك ما سألت.
…بقلـم حكايات منـال علي
في الليلة دي قعدنا نتكلم لأول مرة من غير خناق.
أنا حكيتلها ليه شايف المشاركة مهمة.
وهي حكتلي ليه الاستقلال بالنسبالها أمان، مش عناد.
ولأول مرة اكتشفنا إن المشكلة ماكنتش الفلوس…
المشكلة إن كل واحد فينا كان شايل ذكريات بيته القديم، وبيحاول يعيشها في بيته الجديد.
بعد ساعات من الكلام، قلتلها: ـ طيب نعمل إيه؟
