خلاف المرتب منال علي 1
خلاف المرتب منال علي 1
في الأول كنت ساكت.
قولت يمكن لسه بنتأقلم.
لكن مع غلاء الأسعار بقيت أحس إن الحمل بيزيد عليا.
مرة رجعت من الشغل مرهق.
قعدت أحسب المصاريف.
الإيجار زاد.
أسعار الأكل نار.
البنزين زاد.
بصيت للورقة وتنهدت.
ياسمين خرجت من الأوضة وقالت:بقلـم حكايات منـال علي
ـ مالك؟
قولتلها:
ـ بفكر نحاول نقسم المصاريف بشكل أوضح.
بصتلي باستغراب.
ـ يعني؟
ـ يعني كل شهر كل واحد يحط مبلغ ثابت للبيت.
قالت بمنتهى الهدوء:
ـ ما أنا بجيب حاجات.
ـ أيوه… بس الحاجات دي كل كام شهر… إنما المصاريف كل يوم.
سكتت شوية.
وبعدين قالت:بقلـم حكايات منـال علي
ـ كريم… الشرع مخليش مرتب الزوجة واجب على البيت.
الكلمة وقفتني.
قولتلها:
ـ أنا مش بكلمك في واجب… بكلمك في مشاركة.
ردت:
ـ وأنا بمشارك بطريقتي.
حاولت أقنعها.
هي كانت شايفة إنها صح.
وأنا شايف إني صح.
والموضوع اتقفل.بقلـم حكايات منـال علي
لكن الحقيقة…
مكانش اتقفل.
كان بيتراكم.
كل شهر.
لحد ما جه اليوم اللي غير كل حاجة.
كان عند أهلي عزومة غدا.
أمي عملت الأكل اللي أنا بحبه.
وأبويا كان مبسوط إننا متجمعين.
وسط الكلام…
أمي قالت لياسمين بابتسامة:
ـ أخبار الشغل إيه يا بنتي؟
قالت:
ـ الحمد لله كويس.
وبعدين أبويا قال:بقلـم حكايات منـال علي
ـ أهم حاجة إنكم تعرفوا تديروا حياتكم مع بعض.
ابتسمت.
قال:
ـ زمان أنا وأم كريم كنا بنحط المرتبين في ظرف واحد… ونصرف منه كل حاجة.
أمي ضحكت وقالت:
ـ ولا كنا نعرف ده مرتب مين وده مرتب مين.
كنت ساكت.
لكن أمي كملت وهي بتبص لياسمين:
ـ طول ما الزوجين بقوا أسرة… يبقى الفلوس كلها للأسرة.
ياسمين حطت الشوكة من إيدها.
وقالت بهدوء شديد:بقلـم حكايات منـال علي
ـ مع احترامي لحضرتك… الشرع والقانون بيقولوا إن مرتب الزوجة حقها.
المائدة كلها سكتت.
أبويا قال:
ـ صح… بس المشاركة أحسن.
قالت:
ـ وأنا بمشارك.
أمي سألتها:
ـ إزاي؟
قالت:
ـ أنا بصرف على نفسي… وده بيريح كريم من مسؤولية كبيرة.
أمي ملامحها اتغيرت.
قالت:
ـ يعني لو احتاج البيت؟
ردت:
ـ لو حبيت أساعد… هساعد.
إنما ده مش فرض عليا.
بصيت لأبويا.
كان ساكت.
لكن عرفت إنه اتضايق.بقلـم حكايات منـال علي
أخويا غمزلي كأنه بيقولي غير الموضوع.
لكن خلاص…
الكلام خرج.
أمي قالت:
ـ يا بنتي… الحياة مشاركة.
ردت ياسمين:
ـ وأنا مقتنعة بكده… لكن المشاركة تبقى بالرضا… مش بالإلزام.
