خلاف المرتب منال علي 1
خلاف المرتب منال علي 1
“مراتي قالتلي: «مرتبي مالي… ومش هصرف منه على البيت إلا بمزاجي». قولتلها: «يبقى سيبي الشغل وأنا أشيل البيت كله». ردها خلاني أحس إن جوازنا كله ممكن ينتهي في ثانية… والصدمة الأكبر كانت قدام أهلي!” بقلـم حكايات منـال علي
كان بقالنا سنة وشهرين متجوزين، والسنة دي عدت فيها أيام حلوة كتير، وعدت فيها خناقات عادية زي أي اتنين لسه بيبنوا بيتهم. عمري ما كنت أتخيل إن أكتر حاجة ممكن تهز جوازنا مش الخيانة، ولا الفلوس نفسها… لكن طريقة التفكير.
أنا اسمي كريم، شغال في شركة مقاولات، مرتبي الحمد لله معقول، مش غني ولا فقير، وبعرف أمشي بيه الدنيا بالعافية مع الأسعار اللي كل يوم بتزيد. ومراتي ياسمين شغالة في بنك، ومرتبها بصراحة أحسن من مرتبي بشوية.
وأنا داخل الجواز كنت مبسوط جدًا إن مراتي بتشتغل. كنت شايف إننا هنعيش مرتاحين، نخطط، نحوش، نسافر، نجيب شقة أكبر بعد كام سنة، وربنا يرزقنا بأولاد نربيهم مرتاحين.
يمكن السبب في تفكيري ده هو البيت اللي اتربيت فيه.
أبويا كان موظف عادي، وأمي كانت مدرسة. طول عمري بشوفهم قاعدين آخر كل شهر على السفرة بعد العشا، يطلعوا الدفاتر ويحسبوا المصاريف.بقلـم حكايات منـال علي
أبويا يقول: ـ الشهر ده عندنا قسط الثلاجة.
أمي ترد: ـ وأنا هدفع مصاريف المدرسة من مرتبي.
ولا مرة سمعت أبويا يقول “ده فلوسي”، ولا مرة سمعت أمي تقول “ده مرتبي وأنا حرة فيه”.
كان كل حاجة اسمها “فلوس البيت”.
عشان كده لما اتقدمت لياسمين واتكلمنا قبل الجواز، قولتلها بكل وضوح:
ـ أنا نفسي نبقى فريق واحد… كل واحد يشيل اللي يقدر عليه.
ابتسمت وقالت: ـ أكيد… إحنا داخلين نبني بيت.
الكلمة دي فضلت في دماغي.بقلـم حكايات منـال علي
“نبني بيت.”
افتكرت إننا فاهمين بعض.
لكن بعد الجواز اكتشفت إن كل واحد كان فاهم الجملة بطريقة مختلفة.
أول كام شهر كنت أنا اللي بدفع كل حاجة تقريبًا.
الإيجار.
الكهربا.
الغاز.
النت.
الأكل.
الخروجات.
ولما كنت أقولها:
ـ محتاجين نشتري غسالة جديدة.
ترد بكل هدوء:
ـ حاضر… هبقى أجيبها.
وأحيانًا فعلًا كانت تشتري حاجة.
مرة جابت ميكروويف.
ومرة اشترت ستاير.
ومرة جابت طقم ملايات غالي.
لكن بالنسبة لها… كده هي شاركت.
أما المصاريف الشهرية نفسها… فكانت شايفة إنها مسؤوليتي.
