همسات من الظلام
همسات من الظلام
مراد وقف ورا ياسين وشوشه تاني:
— بقولك إيه، الست دي شكلها مريب.. مش شايف مطلعة لسانها إزاي وهي بتفحص؟
ياسين بنظرة حادة:
— مالكش دعوة.. أنت واقف ليه؟ تحب أخليها تشرحـ.ـك بدل الجثـ.ـــة؟
مراد سكت بسرعة، ودينا قلعت الجوانتي وقالت بنبرة عملية:
— نفس اللي حصل مع باقي الضحايا.. نفس طريقة القتـ.ـل، آلة حادة ورفيعة، مفيش أي مقاومة، وده بيوضح إنها كانت عارفاه وانصدمت، والقتـ.ــل تم وهي مدياه ضهرها.. نفس القا.تل.. بس!
ياسين ركز عينه عليها:
— بس إيه يا دينا؟ انطقي.
دينا شاورت على رقبة الضحية:
— بس مش نفس الزوايا المرة دي!
مراد بسخرية:
— يعني إيه يا دكتورة؟ ما البنت مقتـ.ـولة ومخنوقة أهي، تفرق إيه إذا كانت الزاوية منفرجة ولا حادة؟
بصت له دينا بقرف وكملت لياسين:
— القاتل المرة دي حب يبتكر.. أو مجبر. في الـ 19 جر.يمة اللي فاتوا، كان بيستخدم إيده اليمين بقوة. المرة دي، الربطة والسحبة من الناحية العكسية تماماً، استخدم إيده الشمال! وبما إن القـ.ــطع طالع بدقة متناهية، فده معناه إنه بيجيد استخدام الإيدين الاتنين بنفس الكفاءة.. بس الشمال المرة دي كان أدق، يعني بنسبة كبيرة المجر.م ده “أشول” وبيتحكم في إيده الشمال أكتر!
ياسين حك دقنه:
— مش يمكن دول اتنين؟ تنظيم؟ واحد باليمين والتاني بالشمال؟
دينا هزت راسها:
— الطب الشرعي النهائي هيحدد.. بس زي ما قولتلك قبل كدا، القا.تل بيمتلك قوة جسدية كبيرة، وكل ضحاياه من النساء عشان يقدر يتحكم فيهم.. ومن ملاحظتي زى ما قولت لحضرتك قبل كدا ، المجر.م ده جراح خبير، أو على الأقل درس الطب والتشريح وعارف هو بيضغط فين وبيقطع إزاي بالميللي.. عن إذنك، هننقل الجثـ.ـــة.
بعد ما دينا مشت، بص مراد لأثرها بضيق ولوى بوزه وقال:
— غوري في داهية! ست نكد وبومة يا ساتر! دي لو اتجوزت إبليس هتنكد عليه وتخليه يلتزم ويصلي الفجر في جماعة من كآبتها! قال أشول قال! دي عيشة تقصر العمر يا جدع!
ياسين ابتسم لأول مرة من ساعة ما دخل الشقة ، كتم ضحكته بصعوبة وضرب كف على كف، ولف لمراد وهو بيهز راسه بذهول:
— أنت إيه يابني بجد؟ إزاي عينوك ظابط وبقيت نقيب؟! أنا بجد مستغرب الحكومة كانت بتفكر في إيه وهي بتسلمك طبنجة وميري وتطلقك على خلق الله!
مراد عدل جاكيت الميري بفخر وثقة و رد:
— بالبركة ودعاء الوالدين يا فندم! وبعدين النجوم دي أنا واخدها سحب في كيس شيبسي أصلاً، متدققش في السي في بتاعي عشان ميزعلش!
