همسات من الظلام
همسات من الظلام
لَف ياسين وبص لمراد وأمره بلهجة صارمة:
— مراد.. خليك مع الراجل هنا ومتتحركش من جنبه ثانية واحدة.. ها؟ فاهم؟
مراد عدل وقفته بسرعة وأومأ براسه وضرب تعظيم سلام من سكات وهو بيبص لياسين بنظرة فهم منها اللعبة:
– علم وينفذ يا فندم.. محبوسين سوا!
ياسين وهو بيركب عربيته، طلع موبايله وكلم رجالة المعاينة بلهجة آمرة:
— بلاش تشمعوا الشقة خالص! ولو شمعتوها رجعوا كل حاجة زي ما هي و خلوا الباب موارب.. سيبوا الوضع كما هو عليه ، فاهمين؟
قفل الخط، وداس بنزين وهو بيبتسم ابتسامة غامضة.. كان رامي طُعم ومستني الصيدة!
…………..
بعد ساعة.. وصلت مريم قدام العمارة، فضلت تتصل للمرة الألف ومفيش رد. نفخت بضيق:
— أوف! مفيش حل غير إني أدخل وأخلص من التُقْل ده!
دخلت وملمحتش البواب، فبرطمت بسخرية:
— هيهيهي.. هربت منه! كان هيقعد يسألني رايحة فين وجاية منين، مع إنه حافظ إننا مش بنفارق بعض!
طلعت السلالم ووقفت قدام الشقة، لفت انتباهها إن الباب موارب ومفتوح سنة صغيرة. بربشت بعينها واستغربت:
— إيه ده؟ هي البت دي هبلة ولا إيه؟ ولا يكونشي الهبلة نزلت تشتري حاجة وسابت الباب كدا؟ هبلة والله وتعملها!
فتحت الباب ودخلت، وفي ثانية ضربت في مناخيرها ريحة نتـ.ـانة قوية قذ.رة كتمت نفسها. حطت إيدها على بوقها بقرف:
— يععع! إيه القرف ده يا سلمى؟ أنتِ ضاربة غطس في مجاري ولا إيه؟
نادت عليها كذا مرة ومفيش رد . نفخت بملل ودخلت وقفت في نص الصالة، وقعدت على الكنبة (كنبة المرحومة!)، مستنية صاحبتها تظهر.
وفجأة.. عيونها لمحت حاجة غريبة على طرف السجادة في الصالة. قامت وقفت بذهول وقربت.. عيونها برقت برعب وهي بتشوف بقعة د.م جافة وغامقة مغرقة الأرض!
قلبها سقط في رجليها، وبدأت تنادي على سلمى بهستيريا ورعب وهي بتجري في الصالة من غير ما تشوف قدامها.. إيدها اترعشت، ورجلها اتكعبلت في رجل الترابيزة بقوة.. “ببببم!”
اتقَلَبت مريم واتخبطت دماغها بحافة الترابيزة الخشبية الحادة.. ألم رهيب شق نفوخها، ود.م دافي بدأ يسيل على وشها، وقبل ما تستوعب، الدنيا اسودت في عينيها وأغمى عليها!
بعد ربع ساعة..
فتحت مريم عينيها ببطء شديد، حاسة بدماغها هتنفجر من الوجع، والرؤية مش واضحة وضبابية. حاولت ترفع راسها وتستوعب هي فين، وفجأة اتجمدت الدورة الدموية في عروقها..
فيه “بوط” أسود عسكري لامع واقف قدام وشها بالميللي.. وببرود مرعب، اترفع سن الجزمة وبدأ يرفع وشها لفوق بقوة وقسوة عشان تبص له!
