همسات من الظلام
همسات من الظلام
ياسين ضحك يأس من طريقته، وبعدين ملامحه رجعت لـلجدية وسأله:
— طب اِتلم بقا وفوق معايا.. مين بقا الحلو اللي بلغ المرة دي؟
مراد قلب جد فجأة بتمثيل متقن، وطلع نوتة الملاحظات بتاعته وفتحها ببطء وهو بيعدل نظارته الوهمية وقال:
— الحلو المرة دي مطلعش حلو خالص للأسف يا باشا، وشكله يسد النفس عن الحياة.. ده صاحب العمارة، الحج موسى. راجل كدا تحس إنه عاصر الحرب العالمية الأولى ومخزّن ريحتها في جلبابه، وجاي يشتكي من الريحة وهو أصلاً منبعها!
ياسين قفل زرار جاكيته بنفاذ صبر وتحرك ناحية الباب وقال:
— تمام أوي.. جيبهولي فورا، وأنا غاير في داهية على المديرية أما نشوف آخرة القرف ده إيه!
مراد ضرب تعظيم سلام ورا ضهر ياسين وقال بهمس:
— مع السلامة يا فندم.. داهية تاخدكم كلكم وتجيب غيركم!
……………
على الجانب الآخر، كانت بطلتنا “مريم” قاعدة في صالة بيتها، ماسكة الموبايل وبتتصل على سلمى (المرحومة اللي لسه متعرفش إنها أصبحت في ذمة الله). نفخت بضيق وهتفت:
— أوف بقا! ما تردي يا تـ.ـورة! مش لدرجة التُقْل دي يعني، ده لو خطيبك مش هتعملي فيه كدا!
بصت في الساعة لقتها ٦ المغرب، قامت وقفت وزعقت بأعلى صوتها:
— يامااااااا!
أمها “سلوى” طلعت لها من المطبخ وقالت بغيظ:
— بتجعري ليه يا بت؟ فزعتيني الله يحرقك! حد ينادي أمه كدا يا حمــ.ـارة؟
مريم لبست طرحتها بسرعة وقالت:
— أنا نازلة رايحة لسلمى.. البت بقالها يومين مابتردش، وهي بنت وحدانية ملهاش حد يا عيني. هروح أطمن عليها، ساعة زمن وجاية، أوك؟
سلوى لوحت بإيدها وقالت ببرود:
— ماشي يختي.. غوري في داهية ومتنسيش تاخدي كيس الزبا.لة وأنتِ نازلة!
مريم لفت راسها وبصت حواليها بتساؤل:
— أومال أخويا كريم “العــ.ـاق” فين؟ مش شايفاه يعني، بقالي ساعة مسمعتش صوت خناق؟
سلوى برقت لها وحدفتها بفردة شبشب :
— أخرسي يا بت! متقوليش على ابني حبيبي عـــ.ـاق! ده دكتور قد الدنيا ومالي مركزه، مش فاشل وقاعد في قرابيزي زيك! على العموم راح شغله في المستشفى، واخلصي امشي ومتتأخريش عشان العشا!
مريم وهي بتلبس بسرعة برطمت بصوت واطي:
— طيب ربنا ياخده.. أنا هلبس و ماشية!
……………..
على الجانب الآخر، في غرفة التحقيق الضيقة بالمديرية، كان الحج موسى قاعد على الكرسي بيرتجف كأنه راكب مرجيحة، ووشه جايب ألوان. ياسين لف حواليه لفة كاملة ببرود مميت، ومراد واقف وراه بيعدل حزامه الميري بنظرات تخوف .
وفجأة.. “بببببم!”.. ياسين هبد بكل قوته على الترابيزة الخشب!
