همسات من الظلام

الحج موسى اتنطط من على الكرسي وصرخ:
— يا فتاح يا عليم يا رزاق يا كريم! في إيه يا باشا؟ ركبي سابت!

ياسين قعد قدامه وهدى نبرته فجأة:
— وحد الله يا حج موسى.. احنا مش جايين ناكلك، احنا جايبينك تتكلم عشان نجيب حق البنت الغلبانة دي اللي اتقـ.ـتلت في ملكك وعمارتك.

الحج موسى رفع إيديه وهو بيرتعش:
— لا إله إلا الله.. والله العظيم يا سعادة الباشا ما ليا دعوة! سلمى دي قد حفيدتي، وكنت برعاها وبشوف كل طلباتها من ساعة ما أهلها ماتوا، دي بنت طيبة ونسمة وملهاش في المشاكل.. أنا استغربت إنها بقالها يومين مش بتنزل ولا بتشتري فطار، وكنت يعني.. أستغفر الله العظيم.. عايز أحصل الإيجار منها برضو عشان الدنيا غلا، فـ اتصلت عليها وطلعت فوق، لقيت تليفونها بيرن جوا ومحدش بيرد، قربت من الباب أسمع، شميت الريحة الوحشة دي واتفزعت، وعشان كدا اتصلت وبلغت.. والله ما ليا دعوة ولا أعرف طريق الأذى!

ياسين ضيق عينيه ودرس ملامح الراجل؛ كانت صادقة وبتبكي من الخوف، بس حاسته السادسة بتقول إن فيه خيط تايه وسط الكلام. قرب منه وقال بحدة:
— ماشي يا حاج.. قولي بقا، كان فيه حد بيجيلها؟ بيزورها؟

قعد الراجل يفكر ويهز راسه، وفجأة قال:
— أيوة! أيوة يا بيه.. فيه واحدة صاحبتها أوي، هي الوحيدة اللي كانت بتيجي معاها وتقعد بالساعات.

ياسين مال عليه بسرعة:
— اسمها إيه؟ انطق!

الحج موسى بلع ريقه:
— والله العظيم ما أعرف يا بيه!

ياسين وقف وزعق:
— أنت بتستظرف يا حج موسى؟! مش عارف مين اللي داخل و اللي خارج من ملكك وعمارتك ؟!

الراجل خبى وشه بإيديه:
— وربنا ما أعرف يا سعادة الباشا! كانت بتيجي علطول وتمشي معاها وتروح معاها، فـ مكنتش بسألها عيب يعني.. بس بقالها ٤ أيام مش بتجيلها خالص، اختفت فجأة!

ياسين أخد نفس طويل وبص لمراد، وبعدين التفت للحج موسى وبذكائه الثعلبي قرر يعمل خدعة :
— تمام يا حاج موسى.. احنا مصدقينك وهنسيبك تخرج تعيش حياتك، بس لو عرفنا إنك فكرت تهرب برا المحافظة، أنا هجيبك وأطبخك في حلة مكان البنت اللي ماتت دي! سامع؟

الحج موسى كش في نفسه:
— لا يا سعادة البيه، تحت أمرك! أنا قاعد وموجود ومش هتحرك عشان حق الغلبانة دي يطلع.

ياسين ابتسم ابتسامة غامضة وقال:
— تمام يا حاج.. بس عشان الإجراءات والروتين، عايزينك تنورنا هنا في المديرية ساعتين زمن نخلص الورق وبعدين تتفضل.