السكرتيرة الحسناء

الحلقة الخامسة

نزلت شهد لقيت معتصم مستنيها جنب العربيه وبيتكلم في الموبايل واول ما شافها بطل كلام وفضل باصصلها وهي اتكسفت فقالها:
معتصم:ممكن اتعرف عليكي؟؟؟؟؟؟؟
شهد:طبعا طبعا
وقعدوا يضحكوا وفتحلها باب العربيه وساق معتصم بس متكلمش طول الطريق وشهد كانت حاسه انه اتغير فجأه حست انها مدايقه وبعد شويه شغل معتصم اغنيه لعبد الحليم حافظ (كفايه نورك عليه)
معتصم:ساكته ليه؟
شهد:لا ابدا بس حضرتك مش بتتكلم فقلت يمكن مشغول
معتصم بصلها وقال:ايوه انا فعلا بفكر في موضوع مهم
شهد:هو احنا هنقابل مين؟
معتصم:غالبا اربع رجال اعمال ومساعدينهم والسكرتاريه بتاعتهم
شهد:ممكن اعرف المطلوب مني بالضبط؟
معتصم:المطلوب منك يا ستي تكتبي كل اللي بيتقال وتاخدي بالك من الملاحظات المهمه
شهد:حاضر
معتصم بصلها وضحك فسألته:
شهد:بتضحك ليه؟
معتصم:اصل شكلك جميل وانتي جد اوي كده
شهد:انا مش جد انا عاديه جدا
معتصم:طيب يلا عشان قربنا نوصل
وقف معتصم ادام فندق هيلتون وساب مفتاح العربيه عشان يركنوها ودخل لفندق هوه وشهد لقيوا رابيزه كبيره عليها مجموعة رجاله وستات واول حاجه لاحظتها شهد ان كل الستات اكبر منها وحاطين ميك اب زياده وفساتين عريانه اوي وقعدت جنب معتصم ومن الناحيه التانيه كان جنبها راجل عرفها بنفسه انه ابن صاحب شركه كبيره واسمه رامي واتعرف على شهد ولما شهد بصت لمعتصم لقيته بيتكلم مع واحده قاعده جنبه بس مقربه منه اوي ولابسه فستان احمر ضيق جدا وشعرها اسود وطويل وناعم وعماله تكلمه في ودنه ومعتصم عمال يضحك وبعد شويه اتقدم العشا وكان الاكل حلو جدا وبعد كده راحوا كلهم لقاعة الاجتماعات وشربوا القهوه وبعد كده بدأوا شغل وكانت شهد قاعده جنب معتصم وبتكتب كل اللي بقوله بسرعه وعرفت انه شخصيته قويه جدا وكلهم بيعملوله حساب بالرغم من انه اصغر واحد فيهم وبعد ما خلص الاجتماع قرروا يسهروا في النايت كلوب وتحت حست شهد انها مخنوقه اوي وعايزه تروح ولسه هتستأذن من معتصم عشان تمشي لقيت رامي قرب منها وقالها:
رامي:تسمحيلي بالرقصه ده؟
شهد:متأسفه جدا اصلي عندي صداع
رامي:طب تعالي معايا وانا هخليكي تخفي ومسكها من دراعها وشهد كانت هتعيط مش عارفه تتصرف ازاي لكن فجأه لقيت معتصم لف دراعه حواليها وقال لرامي:
معتصم:معلش يا رامي بيه احنا مضطرين نمشي
رامي:اتفضل ,فرصه سعيده يا شهد
شهد مشيت مع معتصم وهي الدموع ماليه عينيها وفي العربيه عدت تعيط فمعتصم قالها:
معتصم:انا آسف
شهد:انت بتعتذر ليه؟
معتصم:عشان جيتي معايا واتعرضتي لسخافة رامي
شهد:حصل خير
معتصم:يعني مسامحاني
شهد:خلاص مفيش حاجه
معتصم:طب يلا اضحكي وخلي عينيكي تلمع
شهد:عينيه تلمع؟؟
معتصم:آه ما انت لما بتضحكي من قلبك عينيكي بتلمع
شهد:يا سلام
معتصم:بجد والله
وقعدت شهد تضحك وراح معتصم اداها منديل تمسح بيه دموعها ووصلها تحت البيت وفضل واقف لغاية ما ركبت الاسانسير وهو حاسس انها بريئه اوي………
وصلت شهد الشقه لقيت احلام مستنياها وسألتها ايه الاخبار وحكتلها شهد كل اللي حصل ودخلت عشان تنام بس احلام حست انها قلقانه على شهد من جو الشغل ده وفي نفس الوقت اطمنت ان معتصم معاها وهيخلي باله منها , شهد غيرت هدومها ولبست قميص نوم قصر نص كم مرسوم عليه ميكي ماوس ونامت وهي فرحانه اوي,معتصم فضل واقف في البلكونه ومش جايله نوم ولقي نفسه بيفكر في شهد بس قرر انه هيتعامل معاها بعد كده على انها السكرتيره بتاعته وبس عشان هو مش بيحب يخلط بين الشغل والعلاقات الشخصيه.

الحلقة السادسة

تاني يوم الصبح وصلت شهد الشركه في معادها وفضلت تخلص اوراق مهمه وبعد ساعه جه معتصم ودخل مكتبه علطول ودخلت شهد تقدمله مواعيد انهارده فقال:
معتصم:شكرا يا شهد,من فضلك مش عايز ازعاج انهارده
شهد:حاضر,عن اذن حضرتك
وخرجت شهد وهي حاسه ان معتصم متغير معاها وفضلت طول اليوم تفكر ايه اللي عملته عشان يعاملها كده؟؟؟؟؟؟؟؟؟؟؟؟؟؟؟
آخر اليوم دخلت شهد عشان تقوله انها هتمشي ولو كان محتاجها في شغل تفضل قاعده فقال:
معتصم:لا اتفضلي انت وهو باصص في اللاب توب بتاعه
ومشيت شهد وهي مدايقه جدا وحاسه انها مش مرتاحه وروحت عالبيت علطول ودخلت اوضتها عشان تنام…………………
بعد ما شهد خرجت من مكتب معتصم ومشيت راح معتصم بص عالباب وهو زعلان عشان عاملها وحش بس لازم يعمل كده عشان شهد بتشتغل عنده وكمان هي صغيره في السن ومعندهاش تجارب فلازم يعاملها في حدود الشغل بس حس انه مش هيقدر يعاملها كده علطول……………..
وفضل الوضع بين معتصم وشهد كده لمدة اسبوع وبعد اسبوع بالضبط رجعت شهد البيت لقيت احلام بتحضر شنطة سفر فسألتها:
شهد:خير يا طنط حضرتك مسافره؟
احلام:لا يا حبيبتي احنا مسافرين
شهد:مسافرين فين؟
احلام:هنسافر شرم الشيخ اسبوع
شهد:طب والشغل؟
احلام:ما هو سفر عشان الشغل عشان نسوق للقريه الجديده وهنعمل معرض كبير
شهد:طب حضرتك ده شغلك وانا هسافر ليه؟
احلام:عشان انت سكرتيرة معتصم ومعتصم هو اللي بلغني انك تسافري معايا
شهد:وهو هيكون هناك؟
احلام :طبعا , يلا حضري شنطتك عشان هنسافر الصبح بدري
شهد:حاضر
وراحت شهد اوضتها وابتدت تختار الهدوم اللي هتاخدها معاها وحست انها فرحانه عشان هتشوف معتصم بره الشركه ويمكن تعرف سبب معاملته الغريبه معاها

وتاني يوم وصلت شهد واحلام المطار احلامم كانت لابسه بدله بني وتحتها قميص زيتي وشهد لبست جينز اسود وقميص قصير اسود وفيه خطوط فضي وكانت فارده شعرها ولابسه نظارهى شمس كبيره سودا وهناك قابلوا معتصم اللي سلم عليهم وفضل طول الرحله يتكلم مع احلام وشهد كانت متغاظه وعماله تقرا في مجله عشان محدش يحس انها مدايقه من حاجه ووصلوا مطار شرم الشيخ وهناك خدتهم عربيه للقريه وكل واحد خد مفتاح اوضته واتفقوا يتقابلوا كمان ساعه عشان يتغدوا سوا ودخلت شهد اوضتها لقيتها جميله جدا وبتبص عالبحر ودخلت البلكونه وكانت فرحانه وعماله تدور فلقيت حد بيضحك بتبص لقيت معتصم في الاوضه اللي جنبها فاتكسفت:
معتصم:عجبتك الاوضه؟
شهد:اه جميله اوي
معتصم:ده اول مره تيجي شرم؟
شهد:اه اول مره
معتصم:وايه رأيك؟
شهد:اجمل مكان شوفته في حياتي
معتصم:طب اعملي حسابك بالليل هفرجك على اجمل اماكن هنا
شهد:بجد؟
معتصم:طبعا لازم تتعرفي على المكان عشان تعرفي تساعديني في المعرض
شهد:اوكيه
ودخلت شهد عشان تستعد للغدا فلبست فستان طويل ابيض كات وعليه صاندال فضي وعقد طويل فضي وفردت شعرها وحطت البيرفيوم بتاعها ونزلت
لقيت احلام واقفه بتتكلم في التليفون فقررت تتمشى لوحدها لغاية ما احلام تخلص تليفون وفضلت تتفرج على المكان وعجبها جدا تقسيم القريه والخدمات اللي بتقدمها ومن بعيد لقيت معتصم واقف مع بنت جميله اوي ولابسه جيبه قصيره وبادي ضيق فحست شهد انها ادايقت فقررت تبعد لكن معتصم شافها فنادى عليها
معتصم:شهد
شهد:مساء الخير
معتصم:اقدملك شهد السكرتيره بتاعتي , ده مايا مديرة العلاقات العامه في اكبر شركه تسويق عقاري منافسه لينا
شهد:اهلا وسهلا
مايا:هاي
وفضل الكلام عادي عن الشغل والقريه بس شهد حست ان مايا كل شويه تحط ايديها على معتصم بطريقه غريبه فاستغربت شهد من تصرفاتها بس عملت نفسها عادي عشان محدش ياخد باله انها ادايقت بس معتصم خد باله واستأذن من مايا وخد شهد على جنب وسألها:
معتصم:مالك يا شهد؟
شهد:لا ابدا مفيش حاجه
معتصم:في حاجه دايقتك؟
شهد:وايه يعني اللي ممكن يدايقني؟
معتصم:مش عارف
شهد:صدقني مفيش حاجه خالص
معتصم:طيب يلا بينا نتغدى مع احلام
شهد:اوكيه