بنت حرام مشيرة محمد

وجدتي ليلى كانت عارفة؟
أمي سكتت
السكتة دي كانت كفاية
قلت لها
أنا هروح لها دلوقتي
مسكت إيدي بسرعة
استني يا مريم
لأ يا أمي أنا استنيت أكتر من عشرين سنة
خرجت من البيت وأنا لأول مرة ما كنتش عارفة أنا زعلانة من مين أكتر
من أبويا اللي ظلمني
ولا من أمي اللي خاڤت
ولا من نفسي اللي فضلت طول عمري أصدق إن المشكلة فيا
الفصل التالت اعتراف الجدة ليلى
وصلت بيت جدتي بعد الضهر
كانت قاعدة في البلكونة بتسقي الزرع
أول ما شافتني قالت
مالك يا مريم؟ وشك مخطۏف ليه؟
حطيت التقرير قدامها
بصت له وفضلت ساكتة
قلت لها
أنا عرفت إن عثمان مش أبويا وإن فيه ملف جيني باسمه ياسين ظهر في النظام
إيديها وقفت وهي ماسكة الإبريق
مين قال لك الكلام ده؟
التقرير يا تيتة واللي أنا عايزاه منك دلوقتي إنك تقولي الحقيقة
قعدت على الكرسي ببطء
وبعد صمت طويل قالت
كنت عارفة إن اليوم ده هييجي
حسيت إن نفسي اتسحب مني
يعني إنتي عارفة؟
عارفة جزء من الحقيقة يا بنتي مش كلها
احكي لي
حطت الإبريق على الأرض وبدأت تتكلم
يوم ولادتك يا مريم حصلت مشكلة كبيرة في المستشفى كان فيه طفلة اتولدت في نفس الليلة اللي إنتي اتولدتي فيها وكانت أمها في حالة خطېرة جدا وبعد الولادة نقلوها العناية المركزة
وإيه علاقتي بالطفلة دي؟
بعد ساعات قليلة المستشفى قالت إن فيه خطأ في أساور الأطفال وإن الإدارة بتراجع الموضوع
خطأ في الأساور؟
أيوه كان فيه طفلين اتنقلوا بين حضانتين أثناء نقلهم لقسم تاني لكن مدير المستشفى وقتها أكد إن كل طفل رجع لأهله وإن مفيش مشكلة
وإنتي صدقتيه؟
جدتي بصت لي ودموعها بدأت تنزل
أنا كنت عايزة أصدق يا بنتي لأن فردوس كانت خارجة من ولادة صعبة وعثمان كان عصبي ومش هيصدق إن فيه خطأ حصل من غير ما يتهمها بحاجة
طب وياسين؟
ياسين كان صغير وكان تعبان في الفترة دي ودخل المستشفى يومين بسبب مشكلة في التنفس
سكتت لحظة وبعدين كملت
لما رجع البيت كان معاه ورق طبي مختلف عن الورق اللي كنت شفته أول مرة
قلبي بدأ يدق أسرع
مختلف إزاي؟
كان فيه رقم ملف متغير واسم ممرضة مكتوب على ورقة قديمة شفتها بالصدفة في شنطة عثمان
وعثمان كان يعرف؟
مش عارفة يا بنتي

هو قال لي إن المستشفى صححت البيانات وإن الموضوع خلص
قربت منها
طب ليه ما اتكلمتيش؟
صړخت فجأة وهي بټعيط
لأني جبانة يا مريم! جبانة وخفت على العيلة من الڤضيحة وخفت عثمان يطرد فردوس وياخد منها عيالها وخفت كلام الناس يهد البيت على اللي فيه
بصيت لها پصدمة
وإنتي سبتيني أكبر وأنا بټشتم كل يوم بكلمة بنت حرام؟
حطت إيديها على وشها
حقك عليا يا بنتي
لأ يا تيتة مش كفاية تقولي حقك عليا أنا اتعذبت سنين وإنتي كنتي شايفة وساكتة
قالت وهي بتترعش
عندي حاجة يمكن تساعدك
قامت بصعوبة ودخلت أوضتها وبعد شوية رجعت بصندوق خشب قديم
فتحته وطلعت منه ظرف أصفر متآكل
ده خطاب لقيته في أوراق جدك بعد ۏفاته وما عرفتش أعمل بيه إيه
أخدت الظرف وفتحته
كان خطاب من شخص اسمه الدكتور حاتم صبري مدير المستشفى وقت ولادتي
ومكتوب فيه
السيدة ليلى المنشاوي
أرجو الحضور لمناقشة الواقعة الخاصة بسجلات المواليد يوم ١٧ أكتوبر حيث إن مراجعة السجلات كشفت عن اختلاف في بيانات طفلين تم نقلهما بين الحضانة وقسم الأطفال
ونرجو عدم اتخاذ أي إجراء قبل مراجعة الملفات الأصلية
وتحت الخطاب توقيع بخط إيد مختلف
توقيع باسم
سامي البدري
بصيت لجدتي
مين سامي البدري؟
قالت
كان موظف سجلات في المستشفى وبعد فترة اختفى من الشغل وسمعت إنه سافر بره مصر
وعثمان يعرف الخطاب ده؟
ما أعرفش
قمت من مكاني وأنا ماسكة الظرف
أنا مش هسيب الموضوع غير لما أعرف كل حاجة
جدتي نادت عليا قبل ما أمشي
يا مريم
لفيت لها
قالت بصوت مكسور
مهما تعرفي ما تخليش الۏجع يخليكي تظلمي حد تاني زي ما اتظلمتي
ما رديتش
لأني في اللحظة دي ما كنتش بفكر في الاڼتقام
كنت بفكر في سؤال واحد
مين أمي الحقيقية؟
الفصل الرابع ياسين مش مجرد أخ
اتصلت بياسين وطلبت منه نقعد في مكان بعيد عن البيت
وافق وقابلني في كافيه صغير في الدقي
أول ما شافني قال
إنتي مخضۏضة ليه يا مريم؟ حصل حاجة؟
حطيت التقرير قدامه
قرأه مرتين وبعدين بص لي
يعني إيه اسمي هنا؟
قلت له
أنا نفسي أعرف
وإنتي شاكّة فيا؟
أنا مش شاكّة فيك يا ياسين أنا شاكّة في كل حاجة اتقالت لنا طول عمرنا
فضل ساكت شوية وبعدين قال
أنا عندي حاجة لازم أقولها لك
بصيت له بترقب
طلع موبايله وفتح صورة قديمة لورقة طبية
من كام سنة وأنا بجدّد البطاقة لقيت اختلاف في تاريخ ميلادي بين شهادة الميلاد وملف التطعيمات القديم بتاعي ولما سألت أبويا قال لي إن المستشفى غلطت في التسجيل وإنه خلص الموضوع من زمان
وإنت صدقته؟
وقتها ما كانش عندي سبب أشك فيه لكن من شهرين وأنا بدور في أوراق أمي لقيت صورة ورقة مكتوب فيها اسم مستشفى الولادة ورقم ملف مش هو نفس الرقم اللي في شهادتي
ليه ما قولتليش؟
بص لي بحزن
لأن أبويا كان بيقول لك كلام وحش وأنا كنت فاكر إن المشكلة بينه وبين أمي وإنه مهما حصل إنتي أختي وماليش حق أدخل نفسي في حاجة ممكن تزود وجعك
قلت له
بس إحنا الاتنين محتاجين نعرف الحقيقة
هز راسه
أنا موافق نعمل تحليل جديد في معمل معتمد وبإجراءات واضحة وكل حاجة تتسجل رسمي
لأول مرة من بداية الحكاية حسيت إن فيه حد واقف جنبي من غير ما يطلب مني أبرر وجودي
لكن لسه فيه سؤال محيرني
لو ياسين مش أخويا بيولوجيا يبقى مين أبوه وأمه؟
ولو إحنا الاتنين اتبدلنا يبقى مين الطفل اللي كان المفروض يبقى مكان كل واحد فينا؟
الفصل الخامس الحقيقة اللي عثمان كان بيهرب منها
بعد يومين اتصل بيا عثمان وطلب إني أروح البيت
لما وصلت لقيته قاعد في الصالة وجدتي وأمي وياسين موجودين
أول ما دخلت قال
اقعدي يا مريم
قعدت من غير ما أتكلم
حط إيده على الترابيزة وقال
سمعت إنك عملتي تحليل من ورايا
قلت له
أيوه
وعرفتي النتيجة؟
عرفت إنك مش أبويا البيولوجي
اتغير لون وشه لكنه حاول يبان ثابت
وده يثبت إيه؟ يثبت إن أمك كانت پتخوني
وقفت مرة واحدة
لأ يا عثمان ده ما يثبتش إن أمي خانتك ده يثبت إنك طول عمرك ظلمتني وظلمتها من غير دليل
ضړب الترابيزة بإيده
إنتي هتعلميني الأدب دلوقتي؟
ياسين وقف وقال
كفاية يا بابا
عثمان بص له پغضب
وإنت مالك؟
مالي إن دي أختي اللي اتربيت معاها طول عمري وإنها مش هتفضل تتشتم قدامي
عثمان ضحك بسخرية
أختك؟ ما يمكن هي مش أختك أصلا
ساعتها ياسين بص له وقال
عشان كده أنا موافق نعمل تحليل رسمي
البيت كله سكت
عثمان بص لنا واحد واحد
وبعدين قال جملة خلتني أحس إننا قربنا من الحقيقة
إنتوا مش فاهمين إنتوا بتلعبوا في إيه
قربت منه وقلت
أمال فهمنا يا عثمان
بص لي بعيون مليانة ڠضب وخوف
فيه حاجات لو اتفتحت مش هتتقفل تاني
قلت له
هي اتفتحت خلاص
قام