حماتي وشريط منع الحمل

حماتي طلعتلي يوم الصباحية الساعة 7 الصبح، وأنا لسه عروسة جديدة وهى بتنهج وبتقولى نسيت بليل اديكى الحبوب دى ، ومدتلي إيدها بشريط منع الحمل وقالت: — خديه يا حبيبتي، إحنا مش عاوزين عيال دلوقتي… سنتين تلاتة كده. بصيتلها باستغراب وقلت: — ليه يا حماتي؟

ضحكت وقالت: — لا يا حبيبتي، متبهدليش نفسك من أولها. انبسطي بحياتك الأول مع جوزك، اخرجوا واتفسحوا وسافروا، وبعد كده ابقوا فكروا في الخلفة. بصيت للشريط في إيدي وقلت: — حاضر. وقبل ما تسيبني وتمشي، رجعت تاني عند الباب وقالت: — آه، نسيت أقولك… ظبطي المنبه كل يوم وخديه في ميعاده، متنسيش.

ضحكت وقلت: — حاضر يا حماتي، متقلقيش. هزت راسها وقالت: — أنا مش بقولك كده من نفسي، ده ابنى عارف ومتفق معايا. الكلمة دي طمنتني أكتر، خصوصًا إني كنت لسه في أول يوم ليا مع جوزي، وقلت أكيد عايزين يعيشوا حياتهم شوية قبل الأطفال.

لكن اللي مكنتش أعرفه وقتها… إن قرار تأجيل الخلفة ده ماكانش عشان ننبسط ونعيش حياتنا زي ما قالت حماتي. كان وراه سبب تاني تمامًا… خدت الشريط منها وقلت لها حاضر، وأول ما خرجت من الأوضة خبّيته في درج هدومي.

كنت كل يوم أطلع واحدة من الشريط، وأرميها في الزبالة من غير ما آخدها. مش عارفة ليه، بس من جوايا كنت رافضة فكرة إني أمنع نفسي من الخلفة عشان حد تاني. جوزي كان عارف إن ماما طلبت مني آخد الحبوب، وكان فاكر إني ملتزمة بيها، وكل يوم يسألني: — خدتي الحباية؟

وأنا أقول له: — أيوه. وكنت مستنية أشوف هنوصل لإيه. عدى شهر… واتنين… لحد ما في الشهر التالت بدأت أحس إني تعبانة طول الوقت، وبشم روايح الأكل بطريقة غريبة، والدورة اتأخرت. عملت اختبار حمل وأنا لوحدي. ولما النتيجة ظهرت قدامي، فضلت أبص عليها وأنا مش مصدقة.

أنا حامل!فرحت من قلبي، وفي نفس الوقت خوفت من رد فعل جوزي وحماتي. رجع جوزي من الشغل، وأول ما عرف إني حامل، وشه اتغير. مش من الفرحة… من الصدمة. وقال لي: — حامل؟!قلت له وأنا بضحك من الفرحة: — أيوه… هنخلف يا حبيبي. سكت شوية، وبعدها قال: — بس إزاي؟

وقتها فهمت إن الموضوع مش مجرد اتفاق على تأجيل الخلفة. وبعدها بدقايق، دخلت حماتي علينا، ولما عرفت إني حامل، بصتلي بنظرة غريبة وقالت: يعني إنتِ مكنتيش بتاخدي الشريط؟اتصدمت وسألتها: — إنتِ عرفتي منين؟ساعتها حماتي سكتت… وبصت لابنها، وكأنها مستنية منه هو اللي يقول الحقيقة.