هل هى 1
هل هى 1
– أنا آسف
ظهر النادل محضرا العصائر , تناولت كوبها وارتشفت رشفه صغيرة منه , تنهدت
-انا مش مستنيه حد ….انا جاوبتك بس عشان مش حابه انك تفسر سكوتى بشكل تانى
خالد مبتسم:مكنتش هفسر حاجه يا سارة
سارة بتجهم: كلكوا بتفسروا اى حاجه بطريقتكوا
خالد: مش كل الناس زى بعضها… لوكلنا واحد يبقى هنعرف ازاى الخير لومكنش فيه ناس تعمل الشر؟… كنا هنعرف العدل منين لو مفيش ناس تظلم؟
سارة: كل الناس دلوقتى بتظلم … بتتهم … ومن غير دليل
خالد: اللى اعرفه عن نفسى انى مش كده
نظرت إيه سارة نظرة طويله وهى تفكر ” انت عماد, كلكوا عماد حتى لو اتغيرت اسميكوا أو شكلكوا … كلكوا عماد”
خالد: سرحتى فإيه؟
سارة: ولاحاجه… عصام اتأخر
خالد: شكلك زهقتى من كلامى
سارة: لا مش قصدى بس مش عوزه اتأخر عشان بابا ميقلقش
خالد: بس انتى مع عصام … افتكر ان بباكى بيكون مطمن عليكى معاه
سارة: اه بس انا مش بحب اتأخر .
ابتسم خالد: لسه فيه بنات كده
سارة: وايه المشكله؟…. اختك بتتأخر بره؟؟
ضحك خالد: لا انا ماليش اخوات … انا وحيد لأبويا الله يرحمه وأمى
سارة: ربنا يخليهالك
خالد: امين … وانتى ليكى أخوات
سارة بإبتسامه حزينه: كان عندى أخ … محمود لو عصام كلمك عنه بس.
خالد: الله يرحمه… كل اللى اعرفه انهم كانوا أصحاب و عصام بيعزه اوى
سارة: كانوا أكتر من الأخوات …بس مفيش حاجه بتفضل على
حالها… الحمد لله … ربنا عوضنا بعصام
خالد: ربنا يصبركوا… انا آسف لو ازعجتك
ابتسمت سارة: مفيش ازعاج … صدقنى
خالد: مصدقك يا سارة….. عصام جه
عصام وهو يسرع صوبهم: آسف آسف آآآآآآآآآسف … كله من هدير
سارة: والله تلاقيك انت اللى اتأخرت وهتتهمها فيها
عصام: يابنتى مرة فحياتك دافعى عنى .. مش معقول كده
خالد وهو ينظر اليها: لو تعرف كانت بتقول عنك إيه من شويه مكنتش هتقول كده
عصام ينظر الى خالد ثم اليها: انا عرفت دلوقتى انا شرقت ليه وانا جاى
سارة: طب مش يلا … عشان نلحق وقتنا؟
عصام : هنلحقه هو هيروح فين يعنى
يضحك خالد وهم يتجهون الى سيارة عصام
عصام: سيب بقى عربيتك هنا ويلا بينا كلنا فعربيتى.. وهرجعك متخفش
خالد: ماشى يا عصام
مرت ثلالث ساعات وهم فى مهمه بحثهم التى ظن الجميع انها لن تنتهى
هدير وهى تجلس الى اقرب كرسى: اه خلاص مش قادرة
سارة: وانا مش حاسه برجليا خلاص
عصام وهو يضحك: وهو احنا لسه لفينا
