اجمد روايه 3

شريف بارتباك
=حاضر ..حاضر يا صادق بيه

اغلق صادق الهاتف في وجهه ثم نظر لاحد رجاله وقال بغضب

=العمليه دي كده شكلها باظت وشكلي انا والي معايا هنتعك فيها ..وابن الرشيدي مش سهل وهتبقى حرب مفتوحه مابينا وبينه واحنا مش قده روحنا ومصالحنا في إديه

ثم أشار له وقال بحده غاضبه

=أنا عاوز عملية تنضيف شامله .. تخلصني منهم كلهم بضربه واحده أظن فاهمني

إبتسم الرجل بثقه
=فاهمك يا صادق بيه

أشار له صادق بالذهاب وهو يقول بتوتر
=اول ما تنفذ بلغني علطول..

ثم تناول هاتفه وبدء في التواصل مع شركائه في جرائمه ضد عمر المرشدي

في نفس التوقيت..

إتصل شريف بهاتف عصمت التي أجابت على الفور
=ايوه ياشريف انا كنت هتصل بيك حالا انا واقعه في مصيبه ومش عارفه هعمل ايه ..

شريف بغضب وتوتر
=وايه الجديد بعني ما انا من يوم ما عرفتكم و المصايب مش راضيه تسيبني وتسيبكم

ثم تابع بتوتر
=سيبك من الكلام ده كله وقوليلي عملتي ايه في حبيبه

عصمت بغضب
=ماهي هي دي المصيبه الي بكلمك عليها..انا كنت جايباها عند اهل مي وفاكره انهم هيخلصوني منها وارتاح لكن كل حاجه باظت و الحاج رفعت عم مي مصمم يجوز حبيبه لعطوه ابن عم مي والفرح وكتب الكتاب هيبقى كمان ساعات

لتضيف بنواح
=ماهم فاكرين ان حبيبه هي مي بنتي

شريف بغضب
=وطبعا مينفعش تجوزي حبيبه لعطوه علشان البطاقه الشخصيه وشهادة الميلاد هيثبتوا كدبك عليهم وان حبيبه مش هي مي بنتك

عصمت بنواح..
=دبرني اعمل إيه مخي واقف من شدة الرعب لو عمر او عم مي عرفوا بإلي عملته هتبقى مصيبه

شريف بتفكير
=إسمعي انتي هتهاربي حبيبه منهم بأي شكل وهتجبيها وهتلاقيني مستنيكي بالعربيه على حدود البلد

عصمت بخوف
=وعمر الي اكيد عرف ان حبيبه اختفت واكيد بيدور عليها.. دا غير ان حبيبه اكيد هتحكيله على كل الي حصلها

شريف بقسوه
=لا متقلقيش من ناحية حبيبه دي أضعف من إن نعملها حساب..مجرد اني هخوفها واهددها بالقتل او بالسجن هتخاف وهتنفذ الي هنقولها عليه

عصمت بتوتر
=طيب وشكلها الي متبهدل ووشها وجسمها الي كله كدمات وجروح

شريف بتفكير
=بسيطه هنقول انك خدتيها معاكي ورحتي تقابلي اهل مي لانك كنتي خايفه تقابليهم لواحدك وصعبتي على حبيبه وعرضت انها تيجي معاكي ونسيتم تبلغوا الي في البيت انكم خارجين ..وبعدين وانتم راجعين في الطريق عملتم حادثه ..وانا هبقى اعملك شوية كدمات وجروح علشان تسبكي الدور