حمل بالتراضى رانيا ابو خديجه ج الاخير

_ يا احمد حد يشوفنا من الدكاترة والممرضين

حسيتها فعلا انكمشت بين ايديا بكسوف …بس اعمل ايه حاسس بيها كانت هتقع وهي بتحاول تتسند وتمشي…مشيت بيها وانا بحكم ايدي عليها
_ اللي يشوف يشوف انا شايل مراتي حبيبتي فيها ايه دي يعني!!
اول ما قولتلها كدة لقيتها ابتسمت وحوطت رقبتي بدراعها وكأن وجودي معاها بيكسر اي حاجز
وصلنا اخيرا القسم اللي هي فيه قسم عناية حديثي الولاده

ساعدتها تلبس كل اللبس المعقم ولبست طبعا زيها ودخلنا سوا

فضلت واقفة تبص عليها بعيون مبتعملش حاجة غير انها بتنزل دموع

_ احمد …انا عايزة.. عايزة ….

لقيتها مبتجمعش كلمة على بعض وهي بصالها كدة ومحتارة ضمتها اكتر من ضهرها ليا وهمست بالقرب من ودنها وانا على وشي ابتسامة بتحارب سيل دموع

_ فاهمك فاهمك وحاسس بيكي والله..بس خلاص الدكتورة قالتلي كلها أيام وينقلوها من هنا للحضانا العاديه ووقتها ممكن نشوفها ونشيلها ونلمسها ونخدها في حضننا كمان

رفعت ايديها على الازاز تحركها وكأنها عايزة تعبره وتدخلها

قربت بشفايفها من الازاز وكانها بتبوسها هي ودموعها ومبتوقفش
كنت واقف وراها قربت ابوسها من خدها بحنية وحضنتها بدراعاتي اكتر ضهرها لصدري وفضلنا نبص عليها سوا كانت نايمة وصحيت تحرك رجليها في الهوا بنوم ..اخيرا ابتسمت من بين دموعها اول ما شافتها صحيت و رقبت حركتها

سبتها واقفه قدامها كتير عارف وفاهم احساسها ايه دلوقتي بس لقيتها بدء نفسها يعلى وجسمها يتقل وهي ساندا عليا .. عرفت انها بدات فعلا تتعب من الوقفه دي وممكن تقع مني

_ كفاية كدة ونبقى نجيلها بكرة.. انتي تعبتي من الوقفه

خدت وقت تبصلها وتمسح دموعها
_ مش حاسه باي تعب …مش حاسه بحاجة غير اني عايزاها دلوقتي في حضني

وبعدين التفتت بجسمها ورمت نفسها في حضني تعيط

_ قولهم يا احمد اني عايزة احضنها …عايزة اخدها في حضني بس… والله مش هعمل حاجه ممكن تضرها او تاذيها.

ضمتها ليا لقيتها بتضمني ليها قوي وكأنها بتعوض احساسها واحتياجها في احتضانها في حضني انا … فضلنا شويه كدة لحد ما حسيت انها هديت انحنيت احط ايدي تحت ركبتها وشيلتها وخرجنا نرجع اوضتها روايات رانيا أبو خديجة

……………………….

رجعنا الاوضة …دخلت بيها لقيت امي وريم بيحضروا حاجتهم وهيمشوا …عرفت الايام اللي فاتت انهم كانوا بيقعدوا معاها كمرافق بالتناوب مع بعض