حمل بالتراضى رانيا ابو خديجه ج الاخير

_ شكرا… شبعت.

سبتة وحطيت حاجة عليا وخرجت من الاوضة للبلكونة .. حاسة اني مخنوقه وهموت هطق كل ما افتكر كلام الزفتة دي … بصيت للسما بحيرة … ياربي طب اعمل ايه جوايا خنقة تكفي الدنيا كلها .. انت عالم اني مليش غيرة وبحبة قوي قوي اعمل ايه بس

_ الدوااا

لحظة والتفت ومن غير ما ابصلة اخدته من ايدة … ناولني نفس الكوباية بس فيها لبن بعصير تاني

_ عايزة ماية

_ لأ علطول هتاخدي العلاج بلبن او عصير عشان معدتك متتعبكيش من كتر العلاج دة

اخدتة فعلا من ايدة وانا من جوايا حاسة اني عايزة اخدة واخبية في الشقة دي ميطلعش منها ابدا والزفتة علا دي متشوفوش بعنيها دي تاني لا هي ولا غيرها يمكن ساعتها ارتاح من إحساس الخنقة دة

…………………….

_ بتعملي ايه؟!

مردتش علية و لا ليا نفس اتكلم معاه أصلا

_ بقولك بتعملي ايه؟!

اوووف ماتسكت بقى شويه

_ هغسل هدومي

_ ماتشغلي الغسالة

_ بايظة عشان مركونة بقالها شهور من غير تشغيل

_ طيب استني هكلم حد ييجي يصلحها

_ مش هقدر استنى .. حاسة الهدوم عليا مكمكمة من ركنتها في الدولاب

_ طيب خلاص خليني ابعت اجيب رباب تساعدك في الحاجات دي وبعدين تمشي علطول

_ قولتلك مش عايزة حد

وسبتة وبدءت احط ميا عشان اغسل الهدوم على ايدي زي ما اتعودت في اوقات كتير في الشقة القديمة لما الغسالة بتاعتة الصغيرة دي كانت أوقات كتير برضة تبوظ

لقيتة اتنهد واتأفف بصوت عالي زي ما يكون هينفجر وبعدين قرب اخد من ايدي الهدوم ولحقني قبل ما اقعد وابدء اغسل

_ هتقعدي وتغسلي ازاي ببطنك دي… اوعي كدة

وفعلا بعدني وقعد هو وهو شكلة متضايق وبدء يغسل في الهدوم… اول مره اشوفة بيغسل من زمان … من ايام ما رجلي اتكسرت في الشقة القديمة وقتها كان بيعمل هو كل حاجة زي دلوقتي

دخلت الاوضة وخرجت منها

_ ايه كل دة؟!

_ دي هدومي اللي في الدولاب كلها ولا عايزني ألبسها مكمكمة يعني

بصلي بغيظ وهو رافع فستان من فساتيني المبلولين في ايدة و كأنه هيزقلني بيه و رجع تاني وهو بيبرطم شويه وبدء يكمل … حطيت ايدي على بوقي اكتم ضحكة خرجت غصب عني … يادي النيلة ده سمعني

_ سيرين!!

_ نعم

_ اطلعي برة.

_ انا واقفة في حمامي على فكرة

_ سيرين!!!!!!

……………………..

خلصت تظبيط الاوضة على قد ما اقدر مقدرش اقعد في مكان مش نضيف او مش متروق … انحنيت وانا بتنهد بتعب افرش السجادة في اوضة النوم … فاجأة حسيت باللي ورايا بيقومني اقف