جنتي علي الارض ٢
جنتي علي الارض ٢
قال كريم على الفور : أنا اسمي كريم حسن ثابت.
هتفت جنه : مش معقول !
” هو ايه اللي مش معقول ”
استدارت جنه لدى سماعها تلك النبره الحاده لتجد إياد خلفها و قد بدا عليه الضيق الشديد.
رد كريم باستخفاف: أبدا يا سيدي ، بقولها اسمي كريم حسن ثابت بس شكلها مش مصدقاني !
قالت جنه بحرج : لا مش قصدي أكذب حضرتك.
قال كريم مداعبا : ايه حضرتك دي..هوانتي بتكلمي جدو رفعت، صحيح أنا دكتور بس مش عجوز و على فكره..
قاطعه إياد وقال : بمناسبة جدو ، ممكن تروح تسلم عليه ده من بدري بيسأل عنك.
قال كريم : لا ازاي ، أنا هروحله حالا، عن اذنك يا جنه.
قال إياد فور مغادرة كريم : يا ريت تحاسبي أكتر على تصرفاتك.
قالت جنه مغتاظه : تقصد ايه،مش فاهمه ؟
رد إياد بعصبيه : بقالك ساعه واقفه بترغي مع راجل كل معرفتك بيه متتعداش الخمس دقايق.
ردت جنه بعنف و قد آلمها أن يفكر فيها بتلك الطريقه : أولا أنا واخده بالي من تصرفاتي جدا ، و يا ريت تطمن إني مش هسببلك أي مشكله عند الظابط ، و مش معني إن حضرتك كفلتني و قدمتلي مساعده يبقى من حقك تدخل في كل تصرف أو حركه بعملها.
قال إياد بهدوء: لا من حقي .
عقدت جنه ذراعيها و قالت : بأي صفه ، و إن كنت تقصد عشان كفلتني عند الظابط ..أنا من بكره هاروح القسم و أعفيك من المسئوليه.
قال إياد ببرود : هو لعب عيال .. طب هتقولي للظابط عنوان أهلك ساعتها ….؟؟؟
صمتت جنه فأردف إياد قائلا : يبقى تسمعي الكلام .
و تركها لينضم بجوار أخته استعدادا لإطفاء الشموع.
***********************
أطفأت نسرين الشموع و علا التصفيق .. و بعد ثوان وجدت رائد أمامها راكعا على قدم واحده و في يده صندوق قطيفه وقال : أنا هيكون أسعد يوم في حياتي لو وافقتي و تكرمتي و قبلتي تتجوزيني ؟
صفق الحضور بشده ..نظرت نسرين حولها فوالدتها تهز رأسها بالايجاب ، أما إياد وقف و في عينيه نظره لم تفهمها، وعندما التفتت لتبحث عن كريم وجدت الصدمه في عينيه، عادت لتنظر للراكع أمامها و قالت : موافقه !
علا التصفيق و التصفير مره أخرى و تقدم الجميع لتهنئتها بعد أن لبست خاتم رائد…
بحثت عنه مره أخرى فلم تجد له أثرا…لقد غادر كريم قبل أن يبارك لها خطبتها.
*************************
أصر إياد أن يقوم عبدالله بتوصيلهما هي و سماح إلى السكن.
