نور

الفصل السادس عشر

قابل أدهم والده بإبتسامته الساخرة كعادته وهو يقول
أدهم : مش ممكن الباشا الكبير منورنى النهارده طب كنت قلت كنت حضرتلك العشا بإيدي
كان والد أدهم رجلأ في العقد السادس من العمر ………..أحمد الحناوي صاحب إمبراطورية الحناوي ………..المال ………..الجاه ……..السلطة ……..القوة كان أحمد الحناوي رجلا ً تميل طباعه إلى القسوة ولكن لم يقسو يوما ً على أدهم فقد كان إبنه الأكبر والمقرب إلى قلبه والنسخة المصغرة منه فقد شرب أدهم ملخص تجارب أبيه مع النساء فاصبح شاباً مثقل بحمل كهلاً وكان يجب أن يكون أدهم من يحمل هذا الحمل فأحمد أبيه لم يحب سوى أمه …………المرأه التي أحبها بجنون وذاق مرارة الهجر على يديها فكره الحب لأنه لم يستطيع أن يكرهها
نظر أحمد لإبنه ضاحكا ً وقال : إمممممممممم بقولك أنا مش فايقلك
أدهم : أسف يا باشا شكلك هربان من البيت التاني وأنا دوشتك ولا البيت التالت
أحمد :  والرابع كمان عايز حاجه بقه
أدهم : أنا خايف أطلعلك
أحمد : خايف تطلعلي …….على بابا
أدهم : يا باشا إنت بتلعب في دوري المحترفين أنا غلبان
أحمد : عايز إيه يا أدهم
أدهم :أنا عارف إنك مش عاجبك حالي وزهقت وقررت أريحك
أحمد : إيه حتنجح أخيراً
أدهم : اه أنا حاجتهد السنة دي علشان أتخرج بقه لإني خلاص زهقت وعايز أستقر
أحمد : إنت عايز تتجوز
أدهم : طول عمرك فاهمني
أحمد : وماله إخترت العروسة بقه على كده

أدهم : نور …………نور مهران
أحمد : بنت محمود
أدهم : أيوه
أحمد : طيب ما في بنات احسن منها كثير وعائلات اكبر من عيلة محمود مهران
أدهم : عارف بس هي دي اللي أنا عايز أتجوزها وشايفها مناسبة ليا
أحمد : دانتا مصمم ومقرر بقه
أدهم : أنا أقدر يا باشا كل حاجه لازم تتم برضاك ….وبيتهيألي محمود مهران محيصدق يناسبنا
أحمد : طبعاً ………… أنا منكرش إنه شاطر وشغل مجموعتي شركاتي كله معاه بس هو حيستفيد من الجوازه دي أكثر ماحنا حنستفيد يعني بالنسبة لي صفقة مش ناجحه يا أدهم
أدهم : معلش يا باشا حعوضهالك في الجوازة الجاية
أحمد :  إشمعنى دي اللي عايز تقلدني فيها
أدهم : خلاص اوعدك بعد الجواز حركز في الشغل اللى إنت عايزة حاعمله
أحمد : حتسافر
أدهم : حسافر وأكمل دراستي بره وأمسك شركة الادوية
أحمد : أنا عملتها علشانك أصلاً انا لو عليا مكنتش عايزك تخش صيدلة من أساسه
أدهم : خلاص بقه الموضوع ده فات واللي حصل حصل ……..بس أوعدك حتلاقيني دراعك اليمين
أحمد :إما نشوف
أدهم : يعني خلاص أتفق معاه وأحدد معاد
أحمد : إتفق وحدد معاد