دموع ممنوعه

…أيوة ، الراجل ده كان باباك ، أيام ماكانت والدتك بتعمل قلب مفتوح ، الكلام ده طبعا عرفته بعد كدة ، لما صممت اعرف مين هو ، المهم ، قعد يتكلم معايا اكتر من ربع ساعة ، قاللى حاجات مش فاكراها اصلا ، لكن مجرد صوته واهتمامه وطيبته ، هو ووالدتك ، هديت ، كدة كدة انا مببكيش ، مبعرفش اعيط ، لكن تمالكت اعصابى تماما بعد كلام والدك معايا ، وأقسمت أنى هردله اللى عمله معايا فى يوم من الأيام ، بعد كدة عرفت خبر وفاته من الجرايد ، بس ربنا مزعلنيش ولقيتك قدامى ومحتاج اللى يساعدك. ..

…يعنى انتى كنتى بتساعدينى عشان تردى دين والدى …

…مساعدتى ليك شغل وانا قبضت تمنه ، رد جميله هيكون بدايته معاك دلوقتى …

…مش فاهم …

…يعنى ، انت كنت خارج دلوقتى وناوى تروح تواجهه ، صح …

… منا لازم أعمل كدة …

…تبقى غلطان لو عملت كدة ، وانت اللى هتخسر كل حاجة ، مش هو …

…وضحى اكتر لو سمحتى …

… اوكى ، ببساطة اوى ، انت هتروح دلوقتى وهتواجهه ، والنتيجة ايه ، يااما هيكدب الكلام ده ، يااما هيكون وقح ويقولك بمنتهى البجاحة ، ايوة انا اللى عملت كدة ، فى الحالتين هينسحب من شركتكم سوا ، وانسحابه طبعا هيوقعلك شركتك ، وفى نفس الوقت عنده شركته هيقف قدامك بيها ، يعنى فى كل الأحوال ، انت اللى هتضيع مش هو …

أعاد ظهره للخلف ببطئ ، وبدأ يفكر فيما تقول ،

…مفكرتش فيها بالطريقة دى …

…أنت مفكرتش اصلا ، الغضب والمفاجأة عموا عنيك عن الصح …

…والحل ؟

…مش لازم حد يعرف انك اكتشفت الموضوع ، الملف اللى معاك ده فيه معظم أسماء الناس اللى بتساعده فى شركتك ، وكمان معظم طرقه ، وصور من كل أوراق شركته ، اقعد مع نفسك ، ورتب اوراقك من جديد ، افصله عن شركتك من غير ما يحس ، وفى نفس الوقت تبدأ تهد فى شركته ، زى ما عمل معاك بالظبط. ..

…تفتكرى هقدر …

..لازم تقدر ، فكر وانا معاك ، لو عايز أى معلومات عن أى شئ ، بس بلغنى …

يبدوا أن حل فريدة لاقى تجاوب واضح مع عقله وقلبه فى آن واحد ، استأذنها ليمشى بعدما اتفق على اللقاء مرة أخرى ، بعدما يفكر ويقرر ماذا سيفعل ، وكيف ستساعده . وبعدما خرج تنهدت فريدة وتمنت أن تكون بما فعلت ردت الجميل لصاحبه.