الحب ١

استمعت ضحى الى نوران لتقول بصوت مفعم بالألم:
الحب ياضحى..الحب

نظرت كل من ضحى وبدور لنوران فى تلك اللحظة لتشعر ضحى بالندم على الفور لتفوهها بتلك الكلمات..فملامح نوران الشاحبة بشدة وعيونها المليئة بالدموع تفصح عن مدى ألمها وضحى تذكرها بكل ما تدركه وتحاول أن لا تفكر فيه رغم أنه محفور فى عقلها وقلبها..ولكن سماعه يذكر أمامها مزق قلبها الى أشلاء..لتقول ضحى على الفور بندم:
أنا آسفة يانوران سامحينى..متزعليش منى..كل اللى أنا قلته والله من خوفى عليكى

رفعت نوران يدها لتمسح دمعة سقطت منها وهى تقول بحزن:
متتأسفيش ياضحى..أنا عارفة ان كل اللى قولتيه من خوفك علية وعارفة كمان ان معاكى حق فى كل كلمة قلتيها..بس غصب عنى ياضحى..قلبى مصمم يسيبنى ويروحله..مش قادرة أسيبه فى محنته لوحده ولا قادرة أتخلى عنه..يمكن فى مرواحى ليه مخاطرة كبيرة..يمكن هتعذب..بس لازم أروحله وأكون جنبه..انتوا الاتنين جربتوا الحب وعارفين يعنى ايه البعد عن الحبيب وخصوصا لو كان فى ازمة بيبقى البعد موت..لو شهاب ياضحى لا قدر الله كان فى مكان سليم كنتى هتتخلى عنه؟لو نزار لا قدر الله حصله اللى حصل لسليم كنتى هتبعدى عنه يابدور؟

نظرت الفتاتين الى بعضهما البعض ..يدركان انها على حق..فلو تبادلا الأدوار مع نوران لفعلوا المستحيل ليكونا بجوار من يحبان..أخذت بدور نفسا عميقا ثم قالت:
معاكى حق يانوران..بس اللى انتى هتعمليه خطر عليكى وعلى قلبك..لو سليم اكتشف انك نوران مش نور..مش عارفة رد فعله هيكون ايه؟

قالت نوران بحزم:
انا مستعدة للمخاطرة دى..أنا عموما خدت دورة تدريبية فى التمريض..من ساعة مادادة سعاد قالتلى انه بيطرد كل ممرضة بتجيله واخر ممرضة طردها كان من يومين..فهروح واجرب حظى..ومين عارف؟

قالت بدور بدهشة:
ده انتى خططتى لكل حاجة بقى

قالت نوران:
بحاول على أد ما أقدر مسيبش حاجة للظروف..و بصراحة انا كنت صرفت نظر عن الموضوع ده من ساعة ما قلتلكوا عليه من فترة وانتوا رفضتوا..بس دادة سعاد كلمتنى انبارح وقالتلى ان نفسية سليم تعبانة اوى..وبصراحة انا قلقانة عليه..ومش هطمن غير بوجودى جنبه

قالت ضحى فى ضيق:
والله ماهيوديكى فى داهية غير دادة سعاد دى

قالت نوران بسرعة:
حرام عليكى ياضحى..دى ست طيبة اوى..لما لاحظت انى كل يوم بروح اطمن عليه من بعيد لبعيد و أبص عليه وهو بيشرب قهوته فى الجنينة..ندهتلى وسمعت حكايتى وصدقت مشاعرى ناحيته..واتعاطفت معايا كمان..وعشان كدة وافقت تساعدنى