حب اعمي ج الاخير

نظر اليه زين قائلا بلهفة:
ومستنيين ايه ؟؟يلا بينا

حمل كل من شهاب وزين سليم بحذر وأدخلوه الى السيارة ليجلس شهاب ويضع رأس سليم على قدميه بحذر شديد..فمن الواضح من تلك الدماء على رأسه ان اصابته خطيرة بينما قال زين مشيرا الى نزار الملقى أرضا:
مش هناخد الحيوان ده معانا..أحسن يفوق ويهرب

ليقول شهاب بسرعة:
ملوش لزوم يازين..نزار مستحيل يهرب

نظر اليه زين ليدرك مقصده..نزار قد مات وانتهى الأمر..ليلقى نظرة سريعة على بدور التى فهمت مقصده بدورها لتتسع عينيها بصدمة وهى تنظر إلى ج*ث*ة نزار ثم تشيح بوجهها فى ألم.. فأسرع زين يضمها اليه لتبكى بقوة بين ذراعيه..ليقاطع بكاءها صوت شهاب القلق قائلا:
أنا آسف ياجماعة..بس سليم لازم يروح المستشفى حالا

لتخرج بدور من حضن زين وهى تتجنب النظر اليه..وتركب السيارة فى جمود..تنهد زين ثم أسرع يركب السيارة ويقودها بسرعة..يرجوا الله أن ينجى صاحبه..وأن تنتهى تلك الليلة دون خسائر أخرى

****************

خرج الطبيب بعد فحص سليم قائلا للجميع:
مع الأسف الحالة حرجة ولازم يدخل عمليات حالا..الوقعتين اللى وقعهم..حركوا مكان قطعة الازاز اللى كانت ضاغطة على عصب البصر وده فى حد ذاته هيسمحلنا بإننا نشيلها لإنها خرجت برة مكانها اللى كان حساس جدا وصعب نقرب منه..بس فى نفس الوقت العملية دى فيها خطر على حياته ولازم حد فيكم يمضى على موافقته باجراء العملية

قال زين بحزم:
أنا اللى همضى واتفضل قوم باجراءاتك يادكتور

أومأ الطبيب برأسه قائلا للمرضة بجواره:
جهزوا المريض ودخلوه اوضة العمليات وهاتوا الاقرار للأستاذ عشان يمضيه ..واستدعوا الدكتور عماد..بسرعة

أومأت الممرضة برأسها وهى تسرع فى خطواتها لتنفذ أوامر الطبيب ليقول هو:
بعد اذنكم هجهز للعملية

قال شهاب:
اتفضل يادكتور

ما ان غادر الطبيب حتى قال شهاب لزين:
زين وصل بدور الفندق ترتاح وبلغ نوران..أكيد هتحب تكون موجودة جنبه وطمن ضحى لإنها أكيد قالبة الدنيا علينا

أومأ زين برأسه قائلا بهدوء:
يلا يابدور ..تعالى معايا

قالت بدور بحزن؛
خلينى هنا يازين..بدور أكيد هتحتاجنى جنبها

شع قلب زين حبا لها..فعلى الرغم من كل ما مرت به اليوم وعلى الرغم من آلامها تود أن تظل بجانب صديقتها تؤازرها فى محنتها ليقول بحنان:
طيب تعالى معايا عشان توصليلها انتى الخبر .. وابقى ارجعى معانا