نهله 5
نهله 5
” كلهم ضحكو وطفو النور واماني روحت ونهال فضلت قاعده تاخد المحلول وجنبها نوال اللي عماله تتكلم معاه وحما.تها اللي عملتلها كوبايه لبن ببلح ”
سلوي جابت الكوبايه وقعدت قدامها: خليكي زي ما انتي وانا هأكلك علشان المحلول ميتفكش من ايدك
نهال بقرف: مبحبش اللبن ساده ولا بحب البلح بقرف منهم الاتنين معرفش اكل حاجه مبحبهاش
سلوي مليت المعلقه: افتحي بس بوقك كدا لو معجبكيش متكليش منه يلا يلاا ” نهال فتحت بقوها واكلت وعجبها وسلوي اكلتها لحد ما خلصت الكوبايه ”
” نهال بصت علي نوال اللي نامت جنبها وراحت في النوم، راحت نهال غمضت عيونها ونامت هي كمان ”
سلوي كانت قاعده قدام التلفزيون فونها رن: ايوا يا ادهم
ادهم: ازيك يما…امال نهال قافله فونها ليه؟
سلوي: الدكتور كتبلها محلولين دم بعت البت اماني مرات رامز علقتهولها ونايمه جوا وهي ونوال
ادهم بهتمام: طيب والدكتور قالها عندك ايه؟
سلوي: انيميا حاده كتبلها جوز محاليل واحد الوقتي وواحد بكرا الصبح وقال نهتم بأكلها لبن وبيض
ادهم برجاء : اكليها والنبي يما وشربيها لبن لو محدش عملها واجبرها تاكل عليها تفضل يومين من غير اكل عادي
سلوي: والله نوال عملتلها فرخه النهارده اكلت لما شبعت وبعد الاكل عملتلها كوباية لبن ببلح اكلتها وانا معاها اهو متخافش يباا
ادهم بحب: ربنا يطولنا في عمرك ويخليكي لينا يمااا ” واحد نده عليه ” اصبر يلاا جايلك اهو نزل الحموله علي ما اجيلك ” طيب يما لما تصحي خليها تفتح فونها وانا ورايا كام حاجه كدا وهكلمك تاني
…………………………..
” الساعه بقت ٥ المغرب ونهال مصدومه هي نامت كل دا ازاي، طلعت من حمام شقتها بعد ما اخدت شاور دافي ولبست بجامتها وشالت فونها من علي الشاحن فتحته كان في اكتر من ١٠ اتصالات من ادهم ومسدجات كتيره راحت اتصلت عليه ”
ادهم بزعيق: اخيراااا افتكرتي ان ليكي جوز يا محترمه من صباحية ربنا برن عليكي وانتي ولا فكرتي تفتحي فونك حتي
نهال اتنهدت وريحت ضهرها علي السرير: انا منمتش طول الليل من الوجع اول ما اخدت المحلول نمت محستش بنفسي لسه صاحيه يدوب اخدت شاور وكلمتك
ادهم مسح وشه يحاول يهدي: طيب يا نهال مش انتي كويسه؟
نهال بموافقه: ايوا الحمدالله بخير
ادهم بهدوء : تمام روحي بقا شوفي كنتي بتعملي ايه
