نهله 5
نهله 5
” كانت حما.تها قاعده في الصاله قدام التلفزيون بتلف محشي هي ونوال وغزل بتلعب جنبهم ”
سلوي اول ما شافتها علقت: لابسه كدا ورايحه علي فين؟
نهال بصتلها واستغربت هي ليه تسألها اصلا لكن ردت : هروح ابات النهارده عند ماما وهاجي بكرا بليل عايزه حاجه قبل ما امشي
سلوي معجبهاش كلامها: وجوزك عارف بالكلام دا ولا قولتي ما هو سافر بقا هيعرف منين وواخده في وشك وماشيه
نهال اضايقت من اسلوبها وقالت بضيق: علي فكره انا مبتحركش غير لما جوزي يسمحلي واه عرفته وقالت روحي ولو مش محتاجه حاجه مني استأذنك ” ونزلت من البيت وهي متغاظه ”
سلوي اتنرفزت من كلامها وقالت بصوت عالي يوصلها : بدأت الشطح بدري اوي طب استني جوزك يطلع من البلد حتي؟ عيله قليلة الادب
نوال بهدوء: معلش يما اكيد مش عارفه تقعد من غير جوزها صعبه عليها برضو
سلوي لوت بوزها وهي بتلف المحشي: دا كُهن بعيد عنك ما صدقت جوزها مشي وعايزه تعمل ام دارين هنا شويه وهناك شويه بس بكبدها انا هرن علي جوزها يشدها بس اغسل ايدي بس
” نوال قعدت معرفتش ترد لكن عرفت ان الايام اللي جايا علي نهال مش هتبقي سهله ابدا ”
……………………………
” نهال فضلت تمشي في العزبه لحد ما تعبت انها تلاقي توكتوك مفيش نهائي وتقرييا العزبه ملهاش اخر وهي بعدت عن البيت جدا فضلت واقفه شويه كمان لحد ما قابلت جميله ”
جميله استغربت وجودها في الشارع: ازيك يا نهال واقفه في الشارع لوحدك كدا ليه؟
نهال اتكلمت معاها اجباري: مستنيه توكتوك علشان اروح عند اهلي ازورهم
جميله ضحكت بخفه: مستحيل تلاقي تكاتك هنا يابنتي احنا بنتصل علي توكتوك يجي يودينا الاماكن اللي بنعوز نروحها
نهال بتعب: طب ما ترنيلي عليه يا جميله بالله عليكي انا ماشيه بقالي حبه حلوين لحد ما ضهري وجعني
“جميله اتصلت علي التوكتوك وفي خلال ٥ دقايق كان جالها ونهال ركبت واديته العنوان ومشيت، وجميله راحت بيت خالتها ”
فون نهال رن في الطريق وكان جوزها ردت بسرعه وبصوت هادي: ايوا يا ادهم
ادهم ابتسم علي صوته اللي وحشه: حبيبي اللي واحشني ومش عارف هكمل من غيره ازاي انا دخلت المطار كلها ربع ساعه واركب الطياره
نهال ابتسمت وقالت بصوت واطي: توصل بالف سلامه يحبيبي انا راكبه توكتوك ورايحه عند ماما اهو
ادهم باستغراب: روحتي ليه دلوقتي كنتي استني بليل صلاح يكون وصل بالعربيه ابويا كان يوديكي لقيتي توكتوك ازاي اصلا
