فى هواها متيم بقلم سماح نجيب القسم الاخير

فأقتربوا ثلاثتهم منها بخوف ولهفة وكل منهم يسرع بسؤالها عما حدث لها

فجلست والدته بجوارها وضمتها إليها قائلة :
– بعد الشر عليكى يا حبيبتى وألف سلامة كده يا رفيق متقولناش على اللى حصل إلا وانت راجع بيها كده

دلك رفيق مؤخرة عنقه بإرهاق وهو يقول:
– محبتش أخضكم يا أمى لأن عارف أنكم كنتوا هتصمموا تروحوا ليها المستشفى

فأخذت رهف دورها بالتعبير عن خوفها لصديقتها ، فجلست على الجانب الاخر من الفراش وهى تحتضنها بحب وقالت :
– ألف سلامة عليكى يا ليان أنا لما شوفتك كده خوفت عليكى أوى والله

تبسمت لهما ليان وهى تقول :
– ربنا ما يحرمنى منكم ابدا يارب

فنظرت لشقيقها الذى يحاول أن يكبت دموعه ، فأشارت له بالاقتراب ، فتركت رهف مكانها لتسمح له بالجلوس بجانبها ، فأنهار باسم بين ذراعيها باكياً بصوت مسموع وهو يغمغم :
– ازاى ده حصل يا ليان بعد الشر عليكى

مازال جسده يرتجف من أثر بكاءه وهى تضمه إليها وتربت عليه ، لعله يهدأ ويكف عن البكاء كالطفل الصغير الذى يبكى من أجل والدته ، فقبلت رأسه وهى تقول:
– إهدى يا حبيبى بالله عليك أنا كويسة أهو قدامك فمتعيطش يا باسم بس يا حبيبى

لم تأتى محاولتها لتهدئته بأى نتيجة ، فما كان من رفيق سوى جذبه إليه حتى إستقام بوقفته ، فقربه منه وهو يربت عليه قائلاً :
– خلاص يا باسم أهدى اختك الحمد لله كويسة وطول ما أنا عايش مش عايزكم تخافوا من حاجة ويلا روح أغسل وشك

امتثل باسم لأمره وخرج من الغرفة ، فنهضت والدته وهى تقول:
– أرتاحى أنتى دلوقتى يا ليان على ما هروح أعملكم حاجة تاكلوا يلا يا رهف علشان تساعدينى

ردت رهف بتفكه كالعادة :
– المساعد ربنا يا حاجة مش حمل فرهدة فى المطبخ أنا هقعد انا وليان نرغى وناكل لبان

ناداها شقيقها قائلاً :
– رهف

علمت هى مغزى نداءه لها ، فإبتسمت له قائلة:
– إما كنتش تحلف بس يا أبيه يلا بينا يا مامتى

إبتسم بخفوت على قولها ، فمدللته لن تغير من سلوكها الممازح أبداً ، فبعد خروج والدته وشقيقته ، جلس على طرف الفراش مقابل لها ، فتلاقت أعينهما بحوار صامت ، فبعد إكتفاءه من الصمت ، رفع يده يتلمس وجنتها بحنان وهو يقول:
– حاسة بإيه دلوقتى يا حبيبتى لسه جرح إيدك بيوجعك

حركت رأسها وهى تقول:
– شوية بس أحسن من الاول

قبل أن يعمل على سحب يده ، رفعت هى يدها ووضعتها عليها وقربتها من فمها تقبل باطنها وهى تقول بحب :
– شكراً يا حبيبى على كل حاجة ربنا ما يحرمنى منك ابدا يارب ، كل مرة كنت بقع فى مشكلة بسبب عدم تفكيرى ، كنت أنت بتنقذنى ، عارفة أن غلطت لما سمعت كلام جوز ماما ورحت معاه من غير ما اقولك بس والله افتكرت ماما كانت تعبانة بجد وعايزة تشوفنى ، بس خلاص حرمت مش هعمل حاجة تانى من غير ما أقولك