عم مراتك باعتلك جواب ٣
عم مراتك باعتلك جواب ٣
آيات بصتله بتفكير وعامر اتكلم معاها مرة تانيه وقال: آيات.. الوضع اللي احنا فيه ده مش هينفع يطول اكتر من كده.. انا مش هسمح ان مراتي تبقى عايشه في مكان وانا في مكان تاني ولما احب اشوفك او اقابلك يبقى في الشارع كده!!
آيات بصتله بتوتر وخجل وقالت: وعايزنا نتقابل فين؟
عامر: في بيتنا يا آيات.
آيات بعصبيه: قولتلك انا هفضل عايشه مع البنات هنا!
عامر بصلها اوي وقال: لحد امتي؟؟
آيات بارتباك: مش عارفه.
عامر بثقة: بس انا بقى عارف.. فاضل أسبوع علي إمتحانات اصحابك وبعد ما الامتحانات تخلص هياخدوا الاجازة وكل واحدة فيهم هترجع تقضي الاجازة مع عيلتها وانتي هتبقي لوحدك وانا مش هسمحلك تعيشي في الشقة لحظة واحدة لوحدك.
آيات بصتله بصدمة وعامر هز راسه بثقة وقالها: فكري كويس يا آيات.. مكانك معايا وفي بيتنا.
آيات فكرت في كلامه بصدمة لأنها فعلا كانت ناسيه امتحانات البنات والاجازة وهي هتخاف تقعد في الشقة لوحدها ومفيش قدامها حل غير عامر!!.
عامر كان عارف انها بتفكر في كلامه وقالها: اطلعي ارتاحي دلوقتي وفكري في كلامي كويس وانا منتظر ردك.
آيات كانت مصدومة ومحتارة ومش عارفه تعمل ايه ودخلت العمارة وهي بتفكر في كلامه وعامر كان واقف متابعها وبيتمنى من قلبه انها توافق تعيش معاه في بيته.
آيات طلعت الشقة وقعدت مع البنات وحكتلهم عن الكلام اللي عامر قاله وهدير ردت عليها وقالت: بصراحة هو عنده حق يا آيات وانا عن نفسي كنت شايله همك ومش عارفه هتعيشي إزاي هنا واحنا في الاجازة!
واتكلمت نغم: انا مش فاهمة انتي ليه مش عايزة تروحي تعيشي معاه في بيته؟؟
ردت آيات بخوف: انا نفسي مش عارفه ليه انا خايفه اعيش معاه في بيته.. مش متخيله ان اكون معاه لوحدنا.. انا حاسه انه غريب عني وانا غريبه عنه.. مش سهل عليا ابدا اني استوعب انه جوزي!
ردت سلمي بهدوء: بس هي دي الحقيقه يا آيات.. هو فعلا جوزك ومن حقه يطلب انك تعيشي معاه في بيته.
آيات بصتلها وقالت: انتوا ليه مش فاهميني.. انا خايفه اصدق انه جوزي واتعود عليه وفجأة يختفي من حياتي تاني!
اتكلمت هدير: مش هيختفي يا آيات.. الوضع دلوقتي مختلف.. انتي مش البنت الصغيرة اللي اتجوزها من خمس سنين وسابها في البلد وسافر.
آيات بصتلها بحيرة وقالت: يعني اعمل ايه انا متلخبطه اوي!؟
