العابثة الصغيرة ١

دخلت دعاء احدي الحمامات العامة ثم ازالت الشارب وباروكة الشعر ليظهر شعرها القصير… ثم خرجت وركبت سيارة أجرة لتعود للمنزل.. دخلت دعاء الحارة وهي تحمل كعكة صغيرة لتحتفل مع منال وعم منعم وشقيقها بنجاح أول يوم لها عندما اوقفها علي

_ دعاء

زفرت بضيق وهي تقول :

_ يا فتاح يا عليم يا رزاق يا كريم… خير

أبتسم علي ونظر إليها وقال :

_ وحشتيني

_ ما تخلصني يا عم روميو مش فاضية لمياعتك

حمحم علي وقال بثقة:

_ أنا شايف أن الموضوع بينا كبر…أنا مقدر أنك متضايقة شوية عشان كده هسامحك علي اللي قولتيه ومستعد ارجعلك…

ضحكت بسخرية وقالت :

_ ايه الكرم ده بس أنا هعيط

_ ده عشان خاطرك بس مع أن أمي حلفت إني مكلمكيش تاني بس أنا لأول مرة أقف قصادها علشانك.

اغتاظت دعاء ثم أمسكت الكعكة ووضعتها علي وجهه وقالت:

_ طيب روح لأمك يا روح أمك

_ كفاية ضحك بقا يا منال.

قالتها دعاء وهي تضحك… حاولت السيطرة علي نفسها وقالت :

_ البيه بيقولي هتنازل واسامحك ونرجع.. ده واحد موهوم بجد فاكرني هرضي بيه بعد اللي حصل.

وضعت منال كفها علي بطنها وقالت بضحك :

_ بس انتي مش سهلة يا دعاء لبستي الواد التورتة في وشه… كل أما أفتكر شكله بطني توجعني من الضحك.

_ متفكرنيش يا منال والله زعلانة علي التورتة اللي لبستها في وشه… كانت غالية خسارة في أمه.

ضربتها منال علي كتفها بمشاغبة وقالت:

_ سيبك من النطع اللي اسمه علي وقوليلي أخبار أول يوم شغل ايه… أنا سمعت من ابويا أن رائد بيه وسيم شوية.

_ شوية ايه…. الواد صاروخ

_ احلفي

_ آه والله يا منال قمر.. قمر أنا في حياته ما شوفت راجل بالشكل ده جمال ايه وكاريزما ايه… وطلة ايه بس….

نظرت إليها منال وقالت :

_ بس ايه

تنهدت دعاء وقالت :

_ بشوف في عيونه حزن كبير… حاسه أنه مكسور وبيخبي ده ببروده.

أمسكت منال كفها وقالت :

_ اقولك علي حاجة سمعتها بس متقوليش لبابا إني قولتلك

_ أكيد.

_ رائد بيه قتـ,ـل مراته وأخوه بعد ما شافهم سوا