لعنه الام وابنتها ج 2 من شهد حياتي 1 1-5

زين بحاجب مرفوع :زين… اخويا… مالك ياض ماتظبط.

رامز:مانت لو سمعتلى.

زين:قول.

رامز:طبعاً انا عارف انا مقطوع من شجرة وحتى عمى بطل يسأل عليا من زمن.

زين بنفاذ صبر:هااا.. اخرة الصعبنيات دى ايه.

رامز:عايزك تخطبلى.

زين:نعم يا خويا.

رامز :ايه يا جدع عايز اكمل نص دينى.

زين:وده من امتى.. بقا انت تتهد وتبطل عط وتتجوز.

رامز:ليه بس مين قال كده… ابطل عط؟ انا؟ انت تصدق حاجة زى كده عليا.

زين :بصراحه لأ وعشان كده مش موافق.

رامز:ليه يابنى البنت عجبانى وبنت ناس وعيله وحلوه وزى القمر.. وانا ظابط اد الدنيا واى حد يتمنانى لبنته.. واهلى ميتين يعنى لا حما ولا اخت جوز.

زين :اه بس عطيط كبير اوى.

رامز:شباب بقا وللشباب احكام.

زين:وهى مين بقا الى عليها العين.

رامز باعين لامعه:البنت الحمرا الى حصلت الخناقه فى المول بسببها.

زين بانتفاضه:جورى… يانهار اسود.. بقى انت تتجوز جورى.. دى بنت بريئه وهاديه.. تاخد واحد عطيط زيك ليه.

رامز :اقعد بس واستهدى بالله.. ماهى عجبانى عشان كده.. حلوه ومؤدبه وصغيره.. يعنى هعلمها الى عايزها تعرفه والى مش عايزها تعرفه مش هعلمهولها… دايماً هبقى فاهمها وعمرها ماتعرف تحور عليا.. وبعدين واحد عطيط زيى زى ما قولت لف ودار وصاع مش هيتجوز غير قطة مغمضه وانت عارف (وللأسف دى حقيقى وبيحصل).

زين برفض تام :لا طبعا.. انت ازاى كده.

رامز:ماتحسسنيش انك عم الشيخ شعراوى.

زين :لا انا مش شيخ انا بنى آدم وخطاء… بس انا مش دايس اوى زيك كده.. اخرى اخرج.. اسهر… لكن ماعملش حاجة تغضب ربنا… ده غير انه كله بيبقى على نور… هما بيبقوا عارفين.. لكن انت داخل على غش ونيتك مش سليمه.. ناوى تغش البنت وتستغل انها طيبه ومؤدبه وبنت ناس.

رامز بكذب:ليه بس كده يازين بس.. مش يمكن ناوى اعتدل واستقيم.. هو يعنى الى زيى مالوش انه يتوب.. وربنا فاتح بابه لينا فى اى وقت.. وبعدين ماهو مين كان هينصحنى ده انا يتيم اب وام.

زين بقوه:ولاااااا… الحبتين دول تروح تعملهم على حد غيرى.. وايه يتيم دى كمان ياشحط انت.. ده انت عديت ال34.

رامز محاولا التأثر:اه والله يتيتم مانت عارف.

زين :رامز باشا… اليتيم ده الى اتبهدل واتمرمط واتشحطت.. الى كان عايش بالعافيه.. لكن انت عندك ورث ماشاءالله.. وعمك راجل محترم وفضل مراعيك. وماتبراش منك غير بعد فضايحك.. مش عليا انا ها… مش عليا.