الحب المستحيل بقلم نهلة ابو شهبة
قرب آدم من فريده ومسك ايديها وابتدوا يرقصوا مع بعض وفريده مكسوفه تبص لآدم وهو فضل باصصلها:
آدم:كل سنه وانتي طيبه يا فريده
فريده:وانت طيب
آدم:من بكره هتبتدي تتعلمي السواقه
فريده:اوكيه
آدم:فستانك جميل اوي
فريده بصتله وهي فرحانه ان الفستان عجبه:بجد
آدم: اصحابك شكلهم لطاف خالص
فريده:آه فعلا , مين اللي كانت بترقص معاك؟
آدم وعينيه بتضحك:ده لانا
فريده:انا عرفت اسمها بس هي مين؟
آدم:يهمك تعرفي؟
فريده ادايقت منه:لا ابدا براحتك
آدم وهو بيضحك :ده بنت صاحبة ماما ومتربين سوا
فريده:بس شكلها واخده عليك اوي
آدم:انتي بتغيري عليه ولا ايه؟
فريده:لا لا اغير ايه
آدم:طيب يلا روحي لاصحابك عشان ابتدوا يمشوا
فريده:انت هتروح للانا؟؟
آدم و هو بيضحكلها:لا هقعد مع ماما
فريده راحت لأصحابها وهي فرحانه اوي ان آدم مقعدش مع لانا تاني بس وهي واقفه مع اصحابها جت لانا و قربت من فريده وقالتلها:
لانا:انتي بقى فريده؟
فريده:ايوه
لانا:ده انتي صغيره اوي
فريده وهي متغاظه منها:انا تميت 18 سنه انهارده
لانا :برده صغيره , ده حتى آدم دايما يقولي فريده ده اختي الصغيره
فريده:وقالك ايه كمان؟
لانا:كل حاجه ده حتى انا اللي اخترتلك لون العربيه
فريده:انتي؟
لانا:ايوه , ايه رأيك في ذوقي؟
فريده:حلو اوي
لانا:طيب عن اذنك بقى عشان آدم مستنيني عشان يوصلني
فريده:اتفضلي
وبصت فريده لقيت لانا ماشيه مع آدم وخارجين من باب الفيلا , وفضلت فريده مع اصحابها لغاية ما مشيوا كلهم وطلعت اوضتها وقعدت عالسرير و قعدت تفكر ان لانا هي المناسبه لآدم عشان كبيره مش لسه بتدرس زيها وكمان جميله جدا وواضح انه بياخد رأيها في كل حاجه , وكمان بيقول انها اخته الصغيره ……… وفضلت فريده تعيط لغاية ما نامت عالسرير بهدومها.
الحلقة الثانية عشر
قررت فريده تحاول تنسى حبها لآدم عشان هو بيعتبرها زي اخته زي ما عرفت من لانا وركزت في دراستها و خصوصا انها طلعت الاولى على الدفعه في سنه تانيه وابتدت السنه الدراسيه الجديده و بقت فريده تروح بعربيتها وكان شكلها حزين وليان وهنا ما عرفوش يخرجوها من الحزن اللي هي فيه بقت فريده علطول بتذاكر وبقت كل ما تقابل آدم بالصدفه تسلم عليه عادي وتستأذن بحجة ان عندها مذاكره وفات اول تيرم وابتدت الاجازه و اول يوم الاجازه جه آدم يكلم فريده وهي قاعده تقرا في الجنينه:
آدم:صباح الخير يا فريده
فريده:صباح الخير يا ىدم
آدم:مالك يا فريده في حاجه مزعلاكي؟
فريده:لا ابدا ليه بتقول كده؟
آدم:اصل شكلك حزين وكمان خاسه جدا
فريده:ده بس من كتر المذاكره
آدم:طيب ايه رأيك نخرج نتعشى سوا انهارده انا وانت بره
فريده ايتسمت لأول مره من مده طويله:بجد
آدم:بجد
فريده:اوكيه
آدم:عايزك تكوني جاهزه الساعه 8 بالضبط
فريده:حاضر
وسابها آدم وراح شغله وكانت فريده هتطير من الفرحه وجت عمتها تقعد معاها:
سلوى:ايه اللي مفرحك كده يا حبيبتي؟
فريده:اصل آدم عازمني على العشا انهارده
سلوى:بقى عشان كده فرحانه
فريده اتوترت: اصلي بقالي كتير مخرجتش
سلوى فكرت شويه وقالت:ربنا يسعدك يا فريده
