قناعه ١

من وقت الخطوبه لما كان خطيبى بيدينى العديه كنت ارفض واقوله انت راجل بتشقى وانت اولى وهاتلك حاجه لنفسك فضلت كده طول الفتره الخطوبه وهو اتعود على كده كنت اجيبله الهدايا فى عيد ميلاده وهو مكنش بيجيب حاجه لانه اتعود منى على اكلمه انت اهم اتجوزنا وبرضوا كنت بخاف اطلب منه حاجه مايكنش معاه فلوس يجيبهالى وبعد جوازنا بكام شهر جاله عقد سفر وسافر وبقى يبعت هدايا لكل العيله إلا أنا كان يبعت يادوب مصروف البيت زى ما كان متعود وخلاص حتى ماذودش المبلغ بس اللى قهرنى إنه بقى يبعت شنطه فيها هدايا عشان ابعتها لأهله وكانوا اهلوا يجيوا وياخدوا الهدايا بتاعتهم ومكنتش بلاقى لنفسى حاجه وقتها حسيت بوجع فى قلبى وقولت اكلمه يمكن انا اللى غلطت من الاول كلمته قولتله إن تليفونى باظ ومحتاجه واحد جديد رد عليه الشهر ده هيبعت لسلفتى التليفون عشان هى طلبت الاول وعدى شهر ورا التانى بقى يتجاهل طلباتى ويبعت لأهله اللى ذاد الطين بلة لما لاحظت إنه بطل يبعت الشنط على شقتي، وبقى يبعتها مباشرة على شقة أمه تحت. في الأول قولت يمكن عشان ما يتعبنيش في طلوع ونزول، بس الحقيقة المرة كانت واضحة زي الشمس؛ هو حتى مبقاش مكسوف مني، ولا فارق معاه إحساسي وأنا شايفه الكل بيفرح بحاجته وأنا كأني غريبة وسطهم. نزلت يومها عند حماتي عشان أساعدها في الغدا، لقيت سلفتي قاعدة وفاتحة كراتين الهدوم والمكياجات اللي لسه واصلة، وعمالة تقيس وتتفرج قدام المراية بفرحة مستفزة. حماتي كانت بتبصلي بطرف عينها بنظرة كلها شماتة ، وكأنها بتقولي "ابني بيعزنا وإنتي ملكيش مكان". فجأة لقيت سلفتي لفتلي وهي ماسكة فستان حرير وبتفرده عليا بمياعة وقالتلي بصوت ينقط سم: "معلش يا حبيبتي، كان نفسي أقولك قيسي الفستان ده، بس أصلي قولتله مقاسي وجابه على قدي بالظبط.. أصلي نسيت أفكره يجيبلك جلابية ولا طرحة معاهم، أصله مشغول ومابيلحقش يفكر في كل حاجة!" بلعت ريقي بصعوبة وأنا حاسة بنار بتغلي في صدري، وقبل ما أنطق ردت حماتي وهي بتعد الفلوس اللي باعتها مع الشنطة وقالت ببرود: "وماله يعني؟ هي أصيلة وقنوعة من يومها، وهو حفظ الدرس وبقى يشوف طلبات اللي بيطلبوا ويتدللوا!" الكلمة نزلت على قلبي زي الرصاصة، حسيت بدموعي هتخوني وتفضح كسرتي، خصوصاً لما سلفتي طلعت التليفون الجديد اللي كنت محتاجاه وهي بتتباهى بيه وبتقول بضحكة صفرا: "شوفتي التليفون تحفه انا اديت ابنى التليفون القديم يلعب بيه ساعتها بس فوقت، الكلمتين دول فوقوني من غيبوبة سنين.. فهمت إن تضحياتي وتنازلاتي وخوفي عليه في الأول ماكانش أصالة في نظره، ده كان رخص وإلغاء لوجودي، وإني أنا بإيدي اللي علمته يسترخصني ويكرم الكل على حساب كرامتي ووجعي. مسحت إيدي وطلعت شقتي وأنا مقررة إن السكوت اللي ضيعني مش هيكمل ثانية واحدة زيادة. اتصلت بيه وقولتله ليه مابعتليش الموبايل وعبايه وهدوم زيهم اكتشفت أنه كش عارف مقاسى أصلا ولا يعرف زوقى ولما سألته عن الموبايل كلامه صدمنى ووقتها ندمت على كل حاجه عملتها رد عليا بكل برود وقسوة وكأن الكلام مش بيذبحني: "وأنا هعرف ذوقك ومقاسك منين يعني؟! هو إنتي عمرك طلبتي؟ ولا عمرك حتى قولتيلى نفسك في إيه؟ ما أنتي اللي عودتيني على الزهد وإنك مش فارق معاكي، وبعدين هما قالولي عايزين إيه بالظبط وبالألوان والمقاسات، إنما إنتي ساكتة وراضية، أعملك إيه يعني؟!" بلعت غصتي وحاولت أتماسك وصوتي بيترج من القهرة: "طب والموبايل؟ أنا مش قولتلك إن تليفوني باظ ومحتاجة واحد ضروري؟ سلفتك واخدة أحدث موديل وإدّت القديم لابنها يلعب بيه، وأنا تليفوني بايظ ومعزولة عن الدنيا!" ضحك باستهانة قطعت آخر حبل رجاء بيني وبينه وقال: "يا ستي وفيها إيه يعني؟ هي طلبت من بدري، وبعدين الصراحة تليفونك ده مش أولوية دلوقتي، أنا مصاريفي كتير هناك والتزاماتي مع أهلي أهم، ابقي خدي تليفون سلفتك القديم مش عيب يعني أهو يمشي الحال، بدل ما ابنها يلعب بيه وخلاص! كبري مخك بقى وماتعمليش مشاكل على خيبات تافهة.. إنتي مش كنتي بتقولي أنا أصيلة ومش بتاعة مظاهر؟ خلاص، خليكي على مبدأك وماتبصيش في إيد غيرك!" الكلمات نزلت على نافوخي زي مية مغلية. "ابقي خدي تليفونها القديم.. وماتبصيش في إيد غيرك!" قفلت السكة في وشه من غير ما أنطق بحرف زيادة. الخط فصل، ومعاه انفصلت تماماً عن الست الطيبة الهبلة اللي كانت مقتنعة إن الرضا والتضحية بيجيبوا تقدير. وقفت قدام المراية وبصيت لملامحي الشاحبة.. أنا اللي عملت في نفسي كده. أنا اللي بنيت لغيري عروش على حساب راحتي وكرامتي، وأنا اللي حفظته إني رخيصة لحد ما صدق إني ما استاهلش حتى تليفون جديد أو فستان على مقاسي، وخليت الكل يرميلي الفتات ويشمت في كسرتي بقلب بارد. ساعتها الدموع نشفت في عيني، والنار اللي كانت قايدة في صدري اتحولت لجليد. مسحت وشي بقوة، وقررت إن الدرس ده كان بفلوس غالية أوي، والست الأصيلة اللي كانت بتموت عشان تسعد الكل دي دفنتها خلاص.. ومن اللحظة دي، مش هدفع قرش من جيبي، ولا هتنازل عن حقي في مليم، واللي استرخصني وباع كرامتي عشان يرضي غيري، هيعرف قريب أوي إن اللي بيتنازل برضاه.. لما بيقرر يقف على حيله، بيهد المعبد كله فوق دماغ اللي فيه. فضلت ليلتها صاحية لحد الفجر، مش بعيط.. العياط ده للضعاف اللي لسه عندهم أمل في العتاب، وأنا الوجع موت جوايا كل حاجة حلوة ليه. الصبح نزلت حماتي ترن عليا الجرس زي عادتها، فتحت الباب بهدوء مريب وبصيتلها ببرود. كانت نازلة رايحة السوق، ومدت إيدها بورقة وقالتلي بنبرة الأمر اللي اتعودت عليها: "خدي يا بت انزلي هاتي الطلبات دي، واطلعي نضفي الصالة بتاعتي عشان سلفتك تعبانة نايمة فوق، وجهزي الغدا عشان ابن عم جوزك جاي يتغدى معانا.. وسلفتك بتقولك لو محتاجة التليفون القديم تعالي خديها برمجيه وابقي نضفيه من لعب الواد." بصيت للورقة اللي في إيدها، وبصيت لعينها الشمتانة، ولقيت ابتسامة هادية وباردة بتترسم على وشي لأول مرة.. سحبت نفسي لورا ومردتش أمد إيدي آخد الورقة. حماتي كرمشت وشها باستغراب: "إيه، مالك متخشبة مكانك كده ليه؟ متمدي إيدك تاخدي الورقة وتنزلي تخلصي اللي وراكي!" رديت بصوت واطي بس كان طالع حاد زي الموس: "معلش يا حماتي.. رجلي وجعاني ومش نازلة، والبيت اللي تحت يتنضف باللي قاعدين فيه واللي بياكلوا خيره.. مش أنا الأصيلة اللي ملهاش في المظاهر ولا الهدوم؟ خلاص، خلي اللي واخدة الفساتين والمكياجات والتليفونات الجديدة تنزل هي تشقى عشان تستاهل اللقمة اللي بتاكلها من خير جوزي." حماتي برقت وعينيها جحظت من الصدمة: "إنتي اتجننتي يا بت إنتي؟! بتعلي حسك عليا ومش عايزة تخدميني؟! ده أنا هكلم ابني أقوله على قلة أدبك!" قولتلها ببرود أشد: "كلميه.. وقوليله كمان إن تليفون سلفتي القديم تخليه لابنها يشبع بيه، ومرمطة ببلاش مبقاش فيه خلاص." قفلت الباب في وشها على تكّة الترباس، وسمعت صريخها ورزعها تحت وشتيمتها. زمان كنت هترعب، هخاف على زعلها وزعل ابنها، كنت هجري أعتذر وأبوس راسها عشان مايشيلوش مني.. لكن دلوقتي؟ ماكانش فارق معايا لو البيت كله اتهد. طلعت تليفوني المكسور، وحاولت أفتحه بصعوبة لحد ما لقط شبكة، وبعتله رسالة واحدة على الواتساب، واضحة ومفيهاش لا عتاب ولا لوم: "مصروف البيت اللي كنت بتبعته بالقطارة ده ميكفنيش أسبوع.. من أول الشهر الجاي هتبعتلي مصروفي الشخصي ومصروف شقتي كاملين زي ما بتبعت لأهلك بالظبط، وأحدث تليفون هينزل في السوق هيوصلي هنا على باب شقتي.. غير كده، أنا ورقة طلاقي توصلي على بيت أهلي، والفلوس اللي شقاك ضايع فيها عليهم هتدفعهالي مؤخر ونفقة ومتعة بالقانون.. اختار يا ابن الأصول، تدفع برضاك وإنت مقدر كرامة مراتك، يا إما تدفع بالشرع والمحاكم، وصدقني مش هسيب فيهم مليم." قفلت التليفون ورميته على السرير، وقفت في نص الصالة وأنا بتنفس لأول مرة من سنين هوا نضيف.. النار اللي كانت كاوية قلبي انطفت، وبدل ما كنت حاسة بالقهر، حسيت بقوة عمري ما جربتها.. وعرفت إن اللي بنى نفسه من الرخص، محدش بيعرف يغلّيه غير لما هو بنفسه يقف ويقول: "لحد هنا وخلاص".

مقالات ذات صلة

سند البيت الجزء الأول

ابن أمه

ما معنى قول النبي ﷺ من نـ,ـام وفي يدهِ غمرٌ ولم يغـ,ـسلْهُ فلا يلومنَّ إلَّا نفسَه

حكايتي مع صهيب ج الاخير

صعيدى من اكسفورد مايا خالد 1

عذراءفي ليله 1

اترك تعليقاً إلغاء الرد